Azərbaycan, Göyçay, 21 dekabr /Trend, müxbir M.Əliyev/
Bazar ertəsi Azərbaycanın Göyçay rayonundakı Olimpiya-İdman Kompleksində bədii gimnastika seksiyasının açılışı keçirilib.
"Bədii gimnastika bölməsinin açılışı Göyçay rayonunda idmanın bu növünün inkişafına yardım edəcək", - rayon İcra Hakimiyyəti başçısının müavini Ramiz İbrahimov açılış mərasimində deyib.
Mərasimdə Azərbaycanın bədii gimnastika yığmasının üzvləri numunəvi nömrələrlə çıxış ediblər.
"Göyçay rayonunda bədii gimnastika bölməsinə artıq 25 qız yazılıb ki, bu da rayonda idmanın bu növünə göstərilən maraqdan xəbər verir", - Azərbaycan Gimnastika Federasiyasının baş katibi Fərid Qayıbov bildirib.
Onun sözlərinə görə, hazırda ölkənin digər rayonlarında da bədii gimnastika bölmələrinin açılması üzrə iş aparılır.
"Göyçaydan və ölkənin digər regionlarından olan istedadlı idmançılar ölkənin milli komandasının sıralarını tamalaya bilərlər. Ona görə də, Azərbaycanın regionlarında bədii gimnastikanın inkişaf etdirilməsi bizim vəzifəmizdir ", - bədii gimnastika üzrə Azərbaycan yığmasının baş məşqçisi Mariana Vasilyevna jurnalistlərə bildirib.
Hazırda bədii gimnastika bölməsi Bakıdan başqa Sumqayıtda və Gəncədə, idman gimnastikası Bakıda, Sumqayıtda və Balakəndə, akrobatika bölməsi Bakıda və Şabranda fəaliyyət göstərir.