Azərbaycan, Bakı, 19 sentyabr /Trend, müxbir İ.İsabalayeva/
Mədəniyyət və Turizm Nazirliyinin təşkilatçılığı ilə sentyabrın 28-30-da Əl Oyunları İdman Sarayında keçiriləcək II Bakı Beynəlxalq Kitab Sərgi-Yarmarkasında 109 kitabxana və çap-poliqrafiya müəssisəsinin iştirak edəcəyi gözlənilir.
Nazirlikdən bazar ertəsi Trend-ə verilən məlumata görə, Azərbaycanın dövlət müstəqilliyinin bərpasının 20-ci ildönümünə həsr olunan sərgidə iştirak etmək üçün Azərbaycandan 88, xarici ölkələrdən 21 çap-poliqrafiya müəssisəsi və kitabxana qeydiyyatdan keçib. Sərgidə kitab təqdimatları, tanınmış yazarlarla görüşlər, ədəbi-bədii gecələr, simpoziumlar və s. keçiriləcək.
Sərginin sonunda Təşkilat Komitəsi tərəfindən ən yaxşı nəşriyyat və ən yaxşı kitab mükafatlandırılacaq.
Sərginin keçirilməsi üçün hazırlıq işləri başa çatmaq üzrədir.
I Bakı Beynəlxalq Kitab Sərgi-Yarmarkası 2009-cu ilin sentyabrında Muzey Mərkəzində keçirilib.