Azərbaycan, Bakı, 15 noyabr /Trend, müxbir İ.İsabalayeva/
Bakı Şəhəri üzrə Təhsil İdarəsi bu gün məktəblilərin "Bilik" yarışına start verib.
İdarənin ictimaiyyətlə əlaqələr sektorunun müdiri Zəminə Əliqızı çərşənbə axşamı Trend-ə bildirib ki, "Bilik" yarışının məktəb turunda V-XI sinif şagirdləri iştirak edəcəklər.
Yarışın bu turunda şagirdlər bütün fənlər üzrə özlərini sınaya biləcəklər. Növbəti rayon turunda isə yalnız VIII-XI sinif şagirdləri yarışda iştirak etmək hüququ qazanacaqlar.
Həmin turda şagirdlər doqquz fənn üzrə yarışacaqlar. Bilik yarışının rayon turunda riyaziyyat, ədəbiyyat, fizika, biologiya, tarix, xarici dil, coğrafiya fənləri üzrə VIII-XI, kimya üzrə IX-XI, informatika fənni üzrə isə X-XI sinif şagirdləri iştirak etmək hüququna malik olacaqlar.
Rayon turuna təqdim ediləcək qaliblərin siyahısı noyabrın 25-nə kimi müəyyənləşəcək.