Azərbaycan, Bakı, 12 aprel / Trend müxbir M.Əliyev/
Bakıda sabah temperaturun aşağı enəcəyi, qısamüddətli az yağış yağacağı gözlənilir.
Ekologiya və Təbii Sərvətlər Nazirliyininin Milli Hidrometeorologiya Departamentinin Hidrometeoroloji Proqnozlar Bürosundan cümə axşamı Trend-ə bildiriblər ki, Bakıda və Abşeron yarımadasında sabah buludlu hava şəraitinin üstünlük təşkil edəcəyi, bəzi yerlərdə arabir qısamüddətli az yağış yağacağı ehtimalı var.
Güclü şimal-qərb küləyi əsəcək. Havanın temperaturunun ötən günlərə nisbətən aşağı enəcəyi, gecə 10-15, gündüz 19-24 dərəcə isti olacağı gözlənilir.
Aprelin 13-dən 14-ü səhərədək Abşeron yarımadasında hava şəraitinin təzadlı dəyişməsi və atmosfer təzyiqinin xeyli yüksəlməsi fonunda güclü xəzri küləyinin əsməsi meteohəssas insanlar üçün əsasən əlverişsizdir. 14-ü gündüz və 15-də meteoroloji amillərin iqlim norması daxilində zəif və mülayim tərəddüdü meteohəssas insanlar üçün əlverişlidir.
Azərbaycanın rayonlarında aprelin 13-də bəzi yerlərdə şimşək çaxacağı, qısamüddətli yağış yağacağı gözlənilir. Arabir güclənən şimal-qərb küləyi əsəcək, havanın temperaturu gecə 9-14, gündüz 20-25, dağlarda gecə 5-10, gündüz 11-16 dərəcə isti olacaq.