Azərbaycan, Bakı, 4 oktyabr /Trend, müxbir K.Zərbalıyeva/
Apelyasiya Məhkəməsi silah və narkotik qaçaqmalçılığında ittiham olunan Azərbaycan, Rusiya və İran vətəndaşlarından ibarət dəstə üzvlərinin cəzasını azaldıb.
Bakı Apelyasiya Məhkəməsindən Trend-ə verilən məlumata görə, qaçaqmalçılıq yolu ilə İrandan Azərbaycana külli miqdarda narkotik vasitələr və silah-sursat keçirməkdə təqsirləndirilən Azərbaycan, Rusiya və İran vətəndaşlarından ibarət mütəşəkkil dəstə üzvlərinin apelyasiya şikayətləri üzrə proses başa çatıb.
Məhkəmə dəstə üzvlərinin şikayətlərini qismən təmin edib və dəstə üzvlərinin hər birinə 7 il müddətinə azadlıqdan məhrum etmə cəzası verilib.
Qeyd edək ki, bundan əvvəl Bakı Ağır Cinayətlər Məhkəməsinin hökmü ilə "Tovuzlu Alik" ləqəbi ilə tanınan Alyoşa Sadıqov 10 il, İbrahim Tanrıverdiyev 8 il, Zadeh Germi Əkbər Əyyub oğlu 10 il, Anatoliy Vaytkeviç 8 il, Qennadiy Bibin 8 il və Sergey Bibin 9 il müddətinə azadlıqdan məhrum edilib.