Azərbaycan, Bakı, 12 fevral /Trend, müxbir Elçin Mehdiyev/
Binəqədi Rayon İcra Hakimiyyəti mətbuatda qanunsuz evlərin sökülməsi ilə bağlı yayılan məlumatlara aydınlıq gətirib.
İcra Hakimiyyəti Aparatının İctimai-siyasi və humanitar məsələlər şöbəsindən Trend-ə verilən məlumatda bildirilir ki, Binəqədi rayonu ərazisinin 51 faizi ARDNŞ-yə məxsusdur.
Bildirilib ki, həmin torpaqlar müvafiq qurum tərəfindən 2005-ci ildən uzunmüddətli sazişlə "Binəqədi Oyl" şirkətinə icarə verilib. Adıçəkilən qurum neft buruqları və mühafizə zolağına düşən qanunsuz tikililərin sökülməsinə dair məhkəmə qarşısında iddia qaldırıb.
Məhkəmənin bununla bağlı 1000-ə yaxın qərarı var. Lakin həmin ərazidə məskunlaşan vətəndaşların yerləşdirilməsi məsələsi nizamlanana qədər qanunsuz tikililərin sökülməsinə dair məhkəmə qərarlarının icrası təxirə salınıb.