Bakı. Trend:
Azərbaycanda işgüzar səfərdə olan İsrailin baş naziri Benyamin Netanyahu bu gün xanımı ilə birgə Bakıda yaşayan yəhudi uşaqlarının “Xabad-Or-Avner” tədris mərkəzinə baş çəkib.
Trend-in məlumatına görə, B.Netanyahu burada Azərbaycanın yəhudi icması ilə görüşüb.
Baş nazir Azərbaycana səfərindən məmnunluğunu bildirib və təhsilə, o cümlədən yəhudi uşaqlarının təhsilinə verdiyi diqqətə görə Heydər Əliyev Fonduna minnətdarlığını bildirib.
İsrailli baş nazir yəhudi uşaq xorunun ifasında yəhudi və Azərbaycan mahnılarını dinləyib.
“Xabad-Or-Avner” tədris mərkəzi Bakıda yaşayan yəhudi uşaqları üçün Heydər Əliyev Fondu və “Or-Avner” Beynəlxalq Fondu tərəfindən tikilib.