...

Memarlıq və İnşaat Universitetində Xocalı soyqırımı ilə bağlı anım tədbiri keçirilib (FOTO)

Cəmiyyət Materials 25 Fevral 2020 17:17 (UTC +04:00)
Bu gün Azərbaycan Memarlıq və İnşaat Universitetində (AzMİU) Xocalı soyqırımının 28-ci ildönümünə həsr olunmuş anım tədbiri keçirilib.
Memarlıq və İnşaat Universitetində Xocalı soyqırımı ilə bağlı anım tədbiri keçirilib (FOTO)

Bakı. Trend:

Bu gün Azərbaycan Memarlıq və İnşaat Universitetində (AzMİU) Xocalı soyqırımının 28-ci ildönümünə həsr olunmuş anım tədbiri keçirilib.

AzMİU-dan Trend-ə verilən məlumata görə, tədbirə gələn qonaqlar əvvəlcə Memarlıq fakültəsinin foyesində Xocalı faciəsini əks etdirən rəsm əsərlərindən ibarət sərgi ilə tanış olublar.

Faciə qurbanlarının xatirəsinin yad olunması ilə başlanan tədbiri Azərbaycan dili və pedaogika kafedrasının müdiri Salatın Əhmədova açıq elan edib. Tariximizin ən ağrılı səhifəsi olan Xocalı faciəsindən, ermənilərin törətdikləri vəhşiliklərdən, əsl həqiqətlərin dünyaya çatdırılmasından danışan kafedra müdiri belə anım günlərində Qarabağ uğrunda gedən döyüşlərdə həlak olan, Vətən yolunda canını qurban verən qəhəman oğullarımızı yada salmağın vacib olduğunu bildirib. S.Əhmədova belə qəhrəmanlardan biri Azərbaycanın Milli Qəhrəmanı Səfiyar Behbudova həsr olunmuş, Mədəniyyət Nazirliyinin sifarişi ilə “Səlnaməfilm” studiyasının çəkdiyi “Qəhrəmanlıq zirvəsi” sənədli filmindən danışıb, sonra film nümayiş olunub.

Filmin nümayişindən sonra AzMİU-nun Ekologiya kafedrasının müdiri, professor Fəqan Əliyev, qəhrəmanın bacısı Naibə Behbudova, filmin rejissoru Kəmalə Musazadə, qəhrəmana həsr olunmuş “Qürur dastanı” poemasının müəllifi Azər Hacıbəyli, qəhrəmanın döyüş yoldaşı, Bərdə özünümüdafiə batalyonunun komandiri Elbrus Rüstəmov çıxış edərək bu cür filmlərin çəkilməsinin və təqdimatların keçirilməsinin insanlara, xüsusən gənclərə vətənə-torpağa sevgi hisslərinin aşılanmasında mühüm əhəmiyyətə malik olduğunu bildiriblər.

Anım mərasimində tələbələrimizdən Pakizə, Nüsrət, Vüsal qəhrəmana həsr olunmuş “Qürur dastanı” poemasından parçalar söyləyib, 1-ci kurs magistr tələbəmiz Tural Rəhmanlı özünün rus dilində yazdığı “26 fevral” şeirini səsləndirib, İncəsənət gimnaziyasının şagirdi Aysu Cəbrayılova şəhidlərə həsr olunmuş musiqi ifa edib.

Tədbirin sonunda çıxış edən AzMİU-nun rektoru, professor Gülçöhrə Məmmədova gənclərə tarixdən dərs almağı, Səfiyar kimi qəhrəman oğullardan nümunə götürüb əsl vətənpərvər və vətəndaş kimi yaşamağı, yeganə düşmənimizin ermənilər olduğunu unutmamağı, düşməndən qisas almaq üçün birləşməyi, erməni vəhşiliyini dünyaya çatdırmaq üçün üzərinə düşən vəzifələri yerinə yetirməyi tövsiyə edib.

Məqalədə:
Xəbər lenti

Xəbər lenti