Bakı. Trend:
Xaçmaz Rayon İcra Hakimiyyətinin təşkilatçılığı ilə Samur-Yalama
Milli Parkında şəhid ailələri, qazilər və Vətən müharibəsinin
iştirakçıları üçün piknik təşkil olunub.
Trend-in məlumatına görə, bazar günü təşkil edilən piknikdə Xaçmaz
Rayon İcra Hakimiyyətinin başçısı Elnur Rzayev və polis şöbəsinin
rəisi Həmid Həsənovda iştirak edib.
Xaçmaz Rayon İcra Hakimiyyətinin başçısı Elnur Rzayev Xaçmaz
rayonunda şəhid ailələrinə, qazilərə və müharibə iştirakçılarına
xüsusi diqqət göstərildiyini və belə tədbirlərin davamlı şəkildə
keçiriləcəyini vurğulayıb.
Açıq havada təşkil olunmuş piknikdə müxtəlif oyunlar oynanılıb,
iştirakçıların istirahəti üçün lazımi şərait yaradılıb.
Şəhid ailələri, qazilər və müharibə iştirakçıları göstərilən yüksək
diqqət və qayğıya görə Azərbaycan Respublikasının Prezidenti İlham
Əliyev və Birinci vitse-prezident Mehriban Əliyevaya
minnətdarlıqlarını ifadə ediblər.
Tədbirin sonunda xatirə şəkilləri çəkdirilib.
