Bakı. Trend:
Bu gün Kapital Bankın “Dəyişiklik səndən başlayır! Ümumtəhsil məktəblərində bullinqlə mübarizə” adlı layihəsinin təqdimat mərasimi keçirilib.
Trend xəbər verir ki, tədbirdə "Kapital Bank" ASC-nin İdarə heyətinin üzvü, İnsan kapitalı və Təşkilati inkişaf üzrə baş inzibatçı Fərqanə Məmmədova, Elm və Təhsil Nazirliyinin nümayəndələri iştirak ediblər.
Məlumata görə, “Dəyişiklik səndən başlayır!” layihəsinin icrasına 18 nömrəli tam orta məktəbdən başlanılacaq. Bu məqsədlə layihənin təqdimat mərasimində 18 nömrəli tam orta məktəbin direktoru Leyla Fətiyeva, Birbank-ın Daxili kommunikasiya və KSM şöbəsinin müdiri Aynur Həsənzadə və “Dərs Evi” Tədris Mərkəzinin icraçı direktoru Nigar Baimova arasında Xartiya imzalanıb.
Layihə çərçivəsində beynəlxalq ekspertlər tərəfindən “Dərs Evi” Tədris Mərkəzinin müəllimləri üçün xüsusi təlimlər keçiriləcək. Təlimlərdə iştirak edən müəllimlər bullinq mövzusunda maarifləndirmə və mübarizə yolları ilə bağlı bilik və bacarıqlarını artıracaqlar. Daha sonra təlim keçmiş müəllimlər ümumtəhsil məktəblərində öz həmkarlarına tədris proqramları təqdim edərək bullinqlə mübarizənin yollarını geniş kütləyə çatdıracaqlar.
Layihənin effektivliyi isə məktəblərdə keçiriləcək sorğular və qiymətləndirmələr vasitəsilə izləniləcək.
