Azərbaycan, Bakı /müxbir Trend K.Zərbalıyeva/ Ömürlük azadlıqdan məhrum edilmiş məhkumların saxlanma şəraitinin yaxşılaşdırılması ilə bağlı yeni qanun layihəsi hazırlanıb. Penitensiar Xidmətin Qərargah rəisi Musa Hümbətov bildirib ki, qanun layihəsi baxılmaq üçün aidiyyatı qurumlara təqdim olunub. M.Hümbətovun sözlərinə görə, yeni qanun qüvvəyə minəndən sonra ömürlük azadlıqdan məhrum edilmiş məhkumların vəziyyəti xeyli yaxşılaşacaq. O, həmçinin qeyd edib ki, bu qəbildən olan məhkumlar üçün yeni həbsxana tikilib istifadəyə veriləndən sonra bu sahədəki problemlərin böyük əksəriyyəti həll olunacaq. Yeni həbsxanada məhkumların işləməsi, onların günün istənilən vaxtında açıq havada gəzintiyə çıxması üçün şərait yaradılacaq. Yeni həbsxananın tikintisi zamanı Türkiyə, Finlyandiya və Estoniyanın həbsxanalarındakı model tətbiq olunacaq. Adıçəkilən ölkələrin həbsxanaları ilə tanışlıq məqsədilə həmin dövlətlərə yaxın gələcəkdə Penitensiar Xidmət əməkdaşlarının səfərləri nəzərdə tutulub.
...