Azərbaycan, Bakı, 25 iyul /müx.TrendLife Süleyman Vəliyev/Azərbaycan estradasının barbisi Rühəngiz Allahverdiyeva, demək olar ki, efirdə görünmür. Nə olub? Yoxsa ATV-də Zaur Baxşəliyevlə olan söz-söhbətdən sonra efirdə görünməkdən qorxdu? Olanlara aydınlıq gətirmək üçün TrendLife müğənninin özü ilə danışdı.
- Hərçənd ki, bəziləri düşünür ki, mənim səsim batıb, ona görə efirdə görünmürəm. Bu, heç də belə deyil. Mənim ən böyük problemim tənbəlliyimdir. Sovet dövründə mənim işlədiyim qədər başqa müğənnilər də çalışsaydılar, indi yəqin boğulardılar. Hər gün öz üzərimdə çalışıram.
- Yayda dincəlmirsiniz?
- İndi dincəlməyə vaxt yoxdur. Hərçənd kənddə dincəlməyi çox sevirəm. Təbiət həmişə məni özünə çəkib. Torpağın iyi, inək südü... Kənd əhli ilə fəxr edirəm. Çox xoşum gəlir ev heyvanlarına baxım, qulluq edim. Uşaqlığım Quba rayonun Mola Kamallı kəndində keçib. İnanın ki, indi həmin vaxtlar üçün burnumun ucu göynəyir.
- Sovet dövründə əməkçi insanlara müxitəlif adlar verirdilər. Məsələn, "Fəxri sağıcı", "Fəxri pambıqçı" və s. və ilaxır. Siz də bunlardan biri ola bilərdiniz?
- Nəyə görə ola bilməzdim? Siz elə bilirsiniz ki, müğənnilik edirəm, bu o deməkdir ki, belə şeylər məndən uzaqdır. Əslində belə deyil. Allah bizləri eyni yaradıb. Müğənni olmasaydım, pambıqçı, dərzi, çayyığan, hətta sağıcı da olardım.
- Şəhərdən kəndə köçməyə sizə nə mane olur ki?
- Təəssüf ki, indi hər şey dəyişib. Dosta, tanışa, böyüyə hörmət qalmayıb. Mən artıq 16-17 ildir ki, professional səhnədəyəm. Əvvəllər qastrollara gedəndə bizə 5 manat 60 qəpik qonarar verirdilər. Buna da çox sevinirdik.
- Əvvəlki kimi həmişəcavan "Barbi" olaraq qalırsınız?
- Həmişə özünə baxmalısan. Yoldaşına maraqlı olmalısan. Ən əsası övladlarına layiqli ana olmalısan.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
