Polşa. Trend:
Azərbaycan boksçusu erməni rəqibinə qalib gələrək “Paris-2024”ə lisenziya qazanıb. Polşada keçirilən III Avropa Oyunlarında boks üzrə yarışların 1/4 final mərhələsinə start verilib. Azərbaycan millisinin heyətində ilk olaraq rinqə Murad Allahverdiyev çıxıb.
Trend-in məlumatına görə, yarışda 80 kiloqram çəki dərəcəsində mübarizə aparan idmançımız Hambardzum Hakobyanla (Ermənistan) üz-üzə gəlib. Hər 3 raundu xeyrinə bitirən Murad yekunda 5:0 (30:26, 30:27, 29:28, 30:27, 30:27) hesabı ilə qalib gəlib və mərhələ adlayıb.
O, yarımfinala çıxmaqla ən azı bürünc medalı təmin edib. M.Allahverdiyev həm də “Paris-2024” Yay Olimpiya Oyunlarına lisenziya qazanıb. Bu onun Fransada təşkil olunacaq Olimpiadaya ilk vəsiqəsi olub.
Ardıcıl olaraq, Kevin Şumann (Almaniya), Nikita Niysted
(Finlandiya) və Hambardzum Hakobyanı (Ermənistan) mübarizədən
kənarlaşdıran Murad yarımfinalda Qabriyel Veoçiçlə (Xorvatiya)
qarşılaşacaq. Görüş iyunun 30-da olacaq.
Qeyd edək ki, bu gün daha 3 boksçumuz dörddəbir final döyüşünə
çıxacaq. Məhsəti Həmzəyeva-Ağamalıyeva (57 kq) Amina Zidanilə
(Fransa), Sərxan Əliyev (71 kq) Makan-Vie Traore (Fransa) ilə və
Məhəmməd Abdullayev (+92 kq) Stilianos Pouliasla (Yunanıstan)
üz-üzə gələcək.
