Bakı. Trend:
Met-Ak şirkəti birinci emissiya üzrə kupon ödənişini həyata keçirib.
Şirkətdən Trend-ə verilən məlumata görə, Met-Ak tərəfindən Emissiya edilmiş 14% gəlirliyi olan, AZ2001020273 İSİN kodlu korporativ istiqraz üzrə 29.04.2018-ci il tarixinə düşən (29.04.2018-ci il tarixi qeyri-iş günü olduğundan) 1-ci kupon ödənişi 30.04.2018-ci il tarixində həyata keçirilib.
Belə ki, 1-ci rüb üzrə 70 000.00 AZN 2000 ədəd istiqraz üçün ödənilib. Bu da hər bir istiqraza görə 3 ay müddətinə 35 AZN gəlir deməkdir.
Bir çox fiziki şəxs tərəfindən etibarlı investisiya aləti hesab edilən Met-Ak istiqrazlarının 1-ci emissiyasını “AzFinance İnvestisia Şirkəti” QSC vasitəsi ilə təkrar bazardan 12% gəlirliklə yəni bu gün (03.05.2018) 1014.5271 AZN qiymətə almaq mümkündür. Cari qiymət hər gün üçün toplanmış faizlər nəzərə alınmaqla hesablanır.
Met-Ak tərəfindən 2-ci Emissiya 19.04.2018-ci il tarixində həyata keçirilib. 12% gəlirliyi olan AZ2002020272 İSİN kodlu korporativ istiqraz üzrə kuponlar ayda bir dəfə ödəniləcək. Bu kağızı “AzFinance İnvestisia Şirkəti” QSC vasitəsi ilə təkrar bazardan 10% gəlirliklə əldə etmək mümkündür. Bu gün üçün cari qiymət 1018.9378 AZN təşkil edir.