Bakı. Trend:
"V4-Azerbaijan Tech Bridge" layihəsi Azərbaycanın startap innovasiyalarını Avropa İttifaqı (Aİ) ölkələri ilə birləşdirəcək.
Trend-in məlumatına görə, bunu Polşanın Azərbaycandakı səfiri Rafal Poborski innovasiyalar üzrə Polşa-Azərbaycan seminarında deyib.
"Bu çoxtərəfli təşəbbüs texnoloji həllər gətirəcək və Azərbaycanın innovasiya ekosisteminin inkişafına kömək edəcək", - deyə R.Poborski bildirib.
Onun sözlərinə görə, layihə çərçivəsində yüksək texnologiyalı həllərin tədqiqi və inkişafı həyata keçiriləcək.
Səfir qeyd edib ki, Polşa innovasiyalar sahəsində təcrübəsini bölüşməyə hazırdır:
"2022-ci il göstəricilərinə əsasən, bizim 5000-dən çox innovativ startap şirkətimiz var. Biz gələcəkdə əməkdaşlığımızı inkişaf etdirməyə və təcrübə mübadiləsi aparmağa hazırıq".
Qeyd edək ki, "V4-Azerbaijan Tech Bridge" layihəsinin məqsədi Vişeqrad Qrupu (Çexiya, Macarıstan, Polşa, Slovakiya) ilə Azərbaycan arasında innovasiyalar sahəsində əməkdaşlığın qurulması və genişləndirilməsidir.