Bakı. Trend:
İğdır-Naxçıvan Qaz Boru Xəttinin Sədərək rayonunda yerləşən Baza stansiyasında son tamamlanma işləri sürətlə davam edir.
Bu barədə Trend-ə Naxçıvan Dövlət Energetika Xidmətindən məlumat verilib.
Stansiyanı elektrik enerjisi ilə təmin etmək üçün yeni 400 metr uzunluğunda orta gərginlikli elektrik xətti çəkilib, 1 ədəd 250 kilovat gücündə yeni transformator məntəqəsi quraşdırılıb.
Qeyd edək ki, İğdır-Naxçıvan Qaz Boru Xəttinin təməli 2023-cü il sentyabrın 25-də qoyulub. İğdır-Naxçıvan qaz kəməri Naxçıvanın qaz təchizatının şaxələndirilməsinə imkan verməklə onun bir mənbədən asılılığını aradan qaldırmış olacaq. 2020-ci il dekabrın 15-də Ankarada Azərbaycan və Türkiyə arasında İğdır-Naxçıvan qaz boru kəmərinin tikintisinə dair anlaşma memorandumu imzalanıb.
Azərbaycan Prezidenti İlham Əliyevin 2022-ci il 10 fevral tarixli Sərəncamına əsasən isə İğdır-Naxçıvan qaz boru kəmərinin tikintisi üçün dövlət büdcəsindən vəsait ayrılıb. Layihə bu il iyunun 5-də qəbul edilən “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”nın prioritet layihələri sırasında yer alıb.
Boru kəmərinin İğdırdan Sədərək rayonuna qədər uzunluğu 97,5 kilometr təşkil edir. Kəmərin Azərbaycan hissəsinin uzunluğu 17,5 kilometr, Türkiyə hissəsinin uzunluğu isə 80 kilometrdir. Boru kəməri gündə 2 milyon kubmetr, ildə isə 730 milyon kubmetr qaz ötürmək qabiliyyətinə malikdir ki, bununla da Naxçıvanın qaza tələbatı tamamilə ödəniləcək.
Gələcəkdə boru kəmərinin ötürücülük qabiliyyətini iki dəfədən çox artırmaq mümkündür.