Azərbaycan, Bakı / Trend , müxbir S.Babayeva/ Azərbaycanın Qiymətli Kağızalr üzrə Dövlət Komitəsi bildirir ki, səhmdar cəmiyyətlərinin fəaliyyəti kifayət qədər şəffaf deyil. Dövlət Komitəsinin sədri Gündüz Məmmədovun cümə günü mətbuat konfransında verdiyi məlumata görə, SC-lərdə idarəetmənin korporativ normaları da lazımi səviyyədə həyata keçirilmir.
"İllik hesabatlar hazırlanıb təqdim olunmur və KİV-lərə açıqlanmır" - deyə komitə sədri bildirib.
Məmmədov bildirib ki, səkkiz ay ərzində komitə tərəfindən təxminən 300 SC-nin maliyyə-təsərrüfat fəaliyyəti ilə bağlı illik hesabatlar toplanıb. "Azərbaycanda 2 minə yaxın səhmdar cəmiyyətinin fəaliyyət göstərdiyini nəzər alsaq, bu, çox aşağı göstəricidir" - deyə Məmmədov bildirib.
Onun sözlərinə görə, səhmdarlara dividendlərin verilməsində də problemlər müşahidə olunur. Yalnız 130-150 SC səhmdarlarına müntəzəm olaraq dividendləri ödəyir. Digərləri isə, gəlirin olmaması səbəbindən və ya gəlirli vəsaitlərin yenidən sərmayə şəklində yatırılması ilə əlaqədar olaraq, dividendləri ödəmirlər.
Məmmədov hesab edir ki, bu nöqsanlar qiymətli kağızlar bazarına olan marağı azalda bilər.
