Azərbaycan, Bakı/ Trend , müxbir İ.Xəlilova/ Qara dəniz Ticarət və İnkişaf Bankının (QTİB) vitse - prezidenti Andrey Kondakov dekabrın 6-da birgünlük səfərlə Bakıya gəlir. Bu barədə çərşənbə axşamı Azərbaycan İqtisadi İnkişaf nazirliyindən məlumat veriblər. "QTİB - in yalnız özəl sektordakı layihələri maliyyələşdirdiyini nəzərə alaraq demək olar ki, səfərin əsas məqsədi banklarla görüşlərin keçirilməsi və bir kredit müqaviləsinin imzalanması olacaq" - İİN-dən bildiriblər. Qara dəniz Bankı yeni istiqamətdə maliyyələşdirməyə başlayır. QTİB Texnikabank Səhmdar Kommersiya Bankına ipoteka kreditləri üçün birinci kredit ayıracaq. Çərşənbə axşamı Texnikabankın sədr müavini Xaqani Quluzadə əvvəllər danışılmış 6 il müddətinə 6 mln. dolların əvəzinə, 8 mln. dollar kreditin ayrılması haqqında razılaşmaya nail olunduğunu bildirib. Faiz tarifi hələ dəqiqləşdirilməli olsa da, libor+3 faizdən çox olacaq. Sədr müavini Texnikabankın kredit vəsaitləri hesabına öz ipoteka proqramını həyata keçirmək niyyətində olduğunu bildirib. Lakin alınmış kredit vəsaitlərinin qısamüddətli olmasını nəzərə alaraq, ipoteka kreditləri 6 il müddətinə veriləcək və kreditin maksimal həcmi 100 min dollara çatacaq. Azərbaycan İpoteka Fondunun şərtlərinə görə, ipoteka kreditinin ümumi həcmi 50 min manatı keçməməlidir və ipoteka üzrə orta tarif 6 faiz təşkil edir. Bu gün Texnikabankın ipoteka portfeli 11 mln. manat təşkil edir və bunun 10.2 mln. manatı AİF vəsaitləri hesabına verilib. İndiyə kimi bank tərəfindən 350 ipoteka krediti verilib.
...
