Azərbaycan, Bakı, 01 fevral / Trend , müxbir İ.Xəlilova/ Azərbaycanın sosial-iqtisadi həyatında əhəmiyyətli dəyişikliklə əlaqədar 2008-ci ilin dövlət büdcəsi proqnozlarına düzəliş ediləcək və may ayında Milli Məclisin müzakirəsinə çıxarılacaq. Bu barədə Parlamentin iqtisadi siyasət məsələləri daimi komissiyasının sədri Ziyad Səmədzadə məlumat verib.
"Ölkədə geniş miqyaslı tikinti işləri bunu zəruri edir. Sosial və iqtisadi inkişaf dövlət proqramlarının reallaşdırılmasına əlavə stimul verir" - deyə Səmədzadə bildirib.
Onun sözlərinə görə, Ağdam və Ağcabədi rayonlarının inkişafı üzrə əlavə tədbirlərin həyata keçirilməsi üçün bu yaxınlarda dövlət başçısının verdiyi göstəriş və digər sərəncamlar layihələrin reallaşdırılması üçün əlavə vəsaitin ayrılmasını tələb edir.
2008-ci il üçün təsdiq olunan dövlət büdcəsinə əsasən, gəlirlər 7 392 500 min manat (o cümlədən mərkəzləşdirilmiş gəlirlər 7134500,7 min manat, yerli gəlirlər 257999,3 min manat), xərclər 8 518 900 min manat (o cümlədən mərkəzləşdirilmiş xərclər 7605576,1 min manat və yerli xərclər 913323,9 min manat) səviyyəsində təsdiq edilib.
Büdcə defisitinin yuxarı həddi 1 126 400 min manat səviyyəsində müəyyən olunub. Azərbaycan Dövlət Neft Fondunun gəlirləri nəzərə alınmaqla, ölkənin icmal büdcə defisiti 3 303 905,0 min manat təşkil edəcək. 2008-ci il üçün icmal büdcə xərclərinin yuxarı həddi 10 192 055 min manat səviyyəsində təsdiq olunub.
