Azərbaycan, Bakı, 11 aprel/ " müxbir İ.Xəlilova/ Kapital Bank dövlət bankı 2007-ci ildə fəaliyyətin yekunları üzrə kredit reytinqinin təzələnməsi məqsədilə, Fitch Ratings və Moody`s beynəlxalq reytinq agentlikləri ilə işini fəallaşdırıb. Bu barədə Kapital Bank-ın marketinq və strateji inkişaf üzrə Departamentinin direktoru Samirə Şərifova məlumat verib.
"Reytinq agentliklərini bankın özəlləşdirilmə məsələsi narahat edir. Lakin, bizim onlara təqdim etməyə hazırlaşdığımız bütün faktlar sübut edir ki, dövlət bank üçün vacib müştəri olub və olmaqda davam edir. Gələcəkdə dövlətlə əməkdaşlığımız hətta möhkəmlənəcək", - Şərivova qeyd edib.
O hesab edir ki, Kapital Bank vacib ümummilli miqyaslı dövlət layihələrinə xidmət göstərilməsinə davam edəcək və geniş filial şəbəkəsi buna imkan verir. Şərifova deyib ki, bankın dövlət layihələrinə xidmət göstərilməsində böyük təcrübəsi var və dövlət dəfələrlə Kapital Bank ilə əməkdaşlığının davam etdirilməsində maraqlı olduğunu bildirib.
Fitch Ratings ötən qiymətləndirmə zamanı tam özəlləşdirilməsindən sonra, bankın reytinqinin azalma təhlükəsinin olduğunu bildirib. Agentlik güman edir ki, bu gün bankda defolt riski əsas səhmdar kimi dövlətin istənilən an Kapital Bank-a dəstək göstərə bilməsi üçün azdır.
Bank rəhbərliyinin rəyinə görə, belə proqnozlar verən agentlik bununla özəlləşdirmənin ikinci mərhələsində Kapital Bank-ın səhmdarları ola biləcək beynəxalq investorlar qarşısında öz üzərinə daha az məsuliyyət götürməyi arzulayır.
Özəlləşdirmənin birinci mərhələsindən sonra bankda dövlət nəzarəti 50 faizədək azalıb və üç yerli şirkət yeni səhmdar olub: Xalq Bank (20 faiz səhm), Ata Holding (20 faiz) və Azersun (20 faiz). Hazırda açıq hərraclar vasitəsilə bankın dövlət mülkiyyətində qalmış 50 faiz səhminin satışı gedir.
Fitch ekspertləri hesab edirlər ki, yüksəkreytinqli əcnəbi sərmayədar tərəfindən böyük sayda minoritar səhmlərin alınması reytinqlərin dəstəklənməsini təmin edə bilər. Bununla əlaqədar olaraq, Fitch özəlləşdirmənin ikinci mərhələsinin nəticələri haqqında məlumat aldıqdan sonra banka yeni reytinq vermək niyyətindədir. Hazırda bankın İDR reytinqi bankın Azərbaycan hakimiyyəti tərəfindən orta dəstəklənmə ehtimalını əks etdirir.
"Özəlləşdirmənin başa çatmasının nəticəsi, yəqin ki, İDR reytinqinin, dəstək reytinqinin və dəstəyin aşağı həddinin azalması olacaq və bu özəlləşdirmədən sonra hakimiyyətin bankın fəaliyyətinin dəstəklənməsinə az marağının olmasını əks etdirəcək", - agentliyin məlumatında deyilib.
Bu gün bank üçün Fitch-in uzunmüddətli reytinqi "BB-", dəstək reytinqi "3" səviyyəsində, dəstəklənmənin aşağı həddi "BB-" - mənfi səviyyəsində müəyyən edilib. Bankın Fərdi reytinqi "D/E" səviyyəsində müəyyən edilib.
Kapital Bank 2000-ci ildə təsis edilib və Azərbaycanda ən böyük filial şəbəkəsinə malikdir (90 filial və bölmə). Bank (əvvəllər Birləşmiş Universal Səhmdar Bankı adı ilə tanınıb) 2000-ci ildə üç dövlət bankının - Əmanət (SSRİ Əmanət Bankının Azərbaycan şöbəsinin varisi), Sənaye-İnvestisiya və Aqrosənaye Bankının birləşməsi nəticəsində yaradılıb. 2005-ci ilin yanvarında bankın adı Kapital Bank-a dəyişdirilib.
Müəlliflə əlaqə saxlamaq üçün elektron ünvan: [email protected]
