Azərbaycan, Bakı, 25 iyul/ Trend / Azərbaycan Mikromaliyyələşdirmə Bankının (AMMB) Direktorlar Şurasında növbəti dəyişikliklər baş verib. AMMB- nin məlumatında bildirildiyi kimi, fəaliyyətə başladığı 2002 - ci ildən bankda çalışan Şakir Rəhimov, LFS-nin məsləhətçisi Aleksandr Larionovu Direktorlar Şurasında Biznes Bankçılığı üzrə direktor vəzifəsində əvəz edib. Bu dəyişiklik əməkdaşın Azərbaycan Milli Bankında attestasiyadan müvəffəqiyyətlə keçməsindən sonra qüvvəyə minib.
AMMB-nın bütün əməkdaşları xarici məsləhətçilərin rəhbərliyi altında təlim keçirlər və onların missiyası bankda yerli işçilərin rəhbər vəzifələrə hazırlanmasından ibarətdir. Hazırda AMMB-nin 700-dən çox işçisi var və rəhbər vəzifələrdə çalışan əməkdaşların çoxu azərbaycanlıdır.
"Mən AMMB-da iş fəaliyyətimə kredit sahəsi üzrə təcrübə keçən mütəxəssis kimi başlamışdım. Bank, digər işçilər kimi, mənim də peşəkar inkişafıma böyük imkanlar yaradıb. Ümid edirəm ki, Direktorlar Şurasının üzvü kimi mikromaliyyələşdirmə sahəsində lider olan bankımızın inkişafına öz töhfələrimi verəcəyəm", - Şakir Rəhimov qeyd edib.
AMMB-nın Baş meneceri Endrü Pospilovski əlavə edib ki, "AMMB Azərbaycan iqtisadiyyatında ikili rol oynayır - kiçik biznesə dəstək və yerli kadrların hazırlanması ilə bank sektorunun inkişafına yardım. Mən çox şadam ki, hazırda bankımızda rəhbər vəzifələrdə çalışan əməkdaşların çoxu azərbaycanlıdır. Cənab Rəhimov AMMB - də işlədiyi altı il ərzində bankda müxtəlif vəzifələrdə çalışaraq, kredit sahəsi üzrə təcrübə keçən mütəxəssis vəzifəsindən Direktorlar Şurasının üzvünədək yüksəlub. Hər il biz 200 - dən çox universitet məzunlarını işə qəbul edərək, bank sahəsi üçün peşəkar mütəxəssislər hazırlayırıq."
Azərbaycan Mikromaliyyələşdirmə Bankı 100% xarici kapitala malikdir. Bank, Avropa Yenidənqurma və İnkişaf Bankı, Beynəlxalq Maliyyə Korporasiyası, Qara Dəniz Ticarət və İnkişaf Bankı, KfW Alman İnkişaf Bankı, LFS Financial Systems GmbH alman Konsaltinq şirkəti və mikromaliyyələşdirmə sahəsində dünya liderlərindən biri olan AccessHolding təşkilatları kimi altı təsisçinin mülkiyyətindədir.