Azərbaycan, Bakı, 05 avqust/ Trend , müxbir S.Babayeva/ Oktyabrın əvvəlində Bakıda ikinci beynəlxalq "Təhsil və Karyera" (Education and Career 2008) sərgisi keçiriləcək.
"Şirkətin müvəffəqiyyət qazanması bilavasitə işçi heyətindən asılıdır.Bu gün Azərbaycanda çoxlarının qarşısında ixtisaslı kadrların seçim problemi kəskin surətdə durub. Sərgi məhz bu problemin həllinə istiqamətlənib", - sərgi təşkilatçısı "Iteca Caspian" şirkətindən bildiriblər.
Sərginin əsas bölümləri - orta və ali təhsil, tədris, staj keçmə və xaricdə təhsil, xarici dil kursları və ixtisasartırma üzrə treninqlər, işə düzəltmə, təhsil sahəsində informasiya texnologiyalarından ibarətdir.
Oktyabrın 2-4-də keçiriləcək sərgi çərçivəsində ilk dəfə olaraq Azərbaycan beynəlxalq kitab yarmarkası və təhsil sahəsində son nailiyyətlər, ölkənin ixtisaslı kadrlara artmaqda olan tələbatı şəraitində Azərbaycan və beynəlxalq ali məktəbləri arasında təcrübə mübadiləsi imkanlarının və birgə layihələrin genişləndirilməsi məqsədi daşıyan beynəlxalq elmi-praktiki konfrans keçiriləcək. Konfransda 200-dən çox nümayəndənin iştirakı gözlənilir.
Ötən il sərgi ilk dəfə keçirilməsinə baxmayaraq, 5 mindən çox işaxtaranı toplaya bilib.
Sərginin keçirilməsində rəsmi dəstəyi Azərbaycan Təhsil Nazirliyi göstərir.