Azərbaycan, Bakı, 02 sentyabr / Trend , müxbir E.İsmayılov/ "Sentyabrın ortalarına qədər "Azərbaycan hava yolları" (AZAL) Qapalı tipli Səhmdar Cəmiyyət Fransa istehsalı olan ATR tipli altıncı (sonuncu) təyyarəni əldə edəcək", - deyə çərşənbə axşamı QSC rəhbəri Cahangir Əsgərov bildirib.
AZAL ATR markalı beşinci təyyarəni iyulda əldə edib. Şirkət tərəfindən üçüncü və dördüncü təyyarələr may və iyun aylarında alınıb.
Ötən il Konsern bu istehsalçıdan iki hava gəmisi alıb. AZAL Fransa istehsalı olan ATR markalı yeni təyyarələrdən ilk növbədə Naxçıvan, Gəncə, Lənkəran və Zaqatala aeroportlarına sərnişin daşımalarında istifadə etmək niyyətindədir.
AZAL ATR tipli təyyarə istehsal edən Fransa aviaqayırma müəssisəsinə iki ATR - 42-500S və dörd ATR - 72-500S təyyarəsinin alınmasına dair sifariş verib. Müqavilənin ümumi dəyəri təxminən 97,2 mln. dollar təşkil edir. Bunlar 50-70 yerlik kiçik təyyarələr olacaq.
Fransa şirkətinin nümayəndələrinin əvvəllər bildirdiyinə görə, altı yeni təyyarənin əldə edilməsi Azərbaycana "Antonov" və "Tupolev" markalarını dəyişməklə parkını yeniləmək və yeni regional marşrutlar yaratmaq imkanı verəcək.
Məqalə müəllifi ilə əlaqə ünvanı - [email protected]
