Bakı. Trend:
Sen-Pyer və Mikelon Fransaya məxsus ərazidir, “bu, göz qabağındadır”. Bunu şənbə günü iki günlük səfər üçün Sen-Pyer və Mikelona gələn Fransa Prezidenti Emmanuel Makron ABŞ Prezidenti Donald Trampın dərc etdiyi və mübahisələrə səbəb olan xəritə ilə bağlı sualı cavablandırarkən deyib.
“Bəzi insanlar qəribə fikirlər səsləndirir və ya qəribə şeylər deyirlər deyə bunu hər səhər təkrar etməyəcəyik”, - deyə Fransa Prezidenti əlavə edib.
ABŞ Prezidenti ayın əvvəlində Şimali Amerikanın, o cümlədən Fransaya məxsus kiçik arxipelaqın ABŞ bayrağı ilə əhatə olunduğu xəritəni dərc etməklə mübahisələrə səbəb olmuşdu.
Fransa Prezidenti bazar günü Kanadanın Baş naziri Mark Karnini Sen-Pyerdə qəbul edəcək. Bu, yerli tarixdə ilk belə görüş olacaq. Sen-Pyer Kanada sahillərindən bir neçə kilometr, Arktika ətrafında yeni strateji maraq mərkəzinə çevrilən Qrenlandiyadan isə bir neçə günlük dəniz məsafəsində yerləşir.
“Bu, güclü mesajdır”, - deyə Makron ABŞ Prezidentinin sərt ritorikasına işarə edərək vurğulayıb. Tramp dünyanın bu hissəsini öz təsir dairəsi hesab edir və mütəmadi olaraq Kanada ərazisini ilhaq etməklə hədələyir. ABŞ hazırda Kanada ilə sərt ticarət qarşıdurması aparır.
Donald Tramp cümə günü Qrenlandiya ilə bağlı planlarını, ən azı müvəqqəti olaraq, dayandırmış kimi görünərək bu muxtar ərazi ilə bağlı Danimarka ilə “təhlükəsizlik” sazişi imzalayıb.
“Danimarkanın suverenliyinə hörmət edilir, beynəlxalq hüquqa hörmət edilir (...) gərginliyin azalmasına xidmət edən hər şey yaxşı haldır”, - deyə Emmanuel Makron bildirib. O, Trampın mümkün “geri addımı” barədə şərh verməkdən imtina edib.
Yaxın Şərqdə müharibənin yaratdığı qiymət artımı fonunda alternativ neft tədarükü mənbələri axtaran Makron böyük neft istehsalçısı olan Kanadadan da alternativ həllər gözləyir. O, xüsusilə “daha çox Kanada mayeləşdirilmiş qazının Atlantik sahillərinə”, yəni Avropaya yönəldilməsini istəyib və ümumilikdə Kanada ilə yeni “əməkdaşlıq perspektivləri” üzərində dayanıb.
Mark Karni isə öz növbəsində cümə axşamı Strasburqda olub və burada Kanada ilə Avropa İttifaqı arasında mühüm yaxınlaşmaya dair razılaşma əldə edib. Bu isə ABŞ prezidentinin yeni qəzəbinə səbəb olub. Tramp cavab olaraq sanksiyalar tətbiq edəcəyini vəd edib.
Fransa Prezidenti eyni zamanda 5 800 sakini olan bu kiçik arxipelaqın gözləntilərinə cavab verməyə çalışacaq. Balıqçılığın, xüsusilə treska ovunun qızıl dövrünün başa çatmasından sonra bölgə yüksək yaşayış xərcləri, əhalinin azalması və iqlim təhlükəsi ilə üzləşib.
Gözləntilərə görə, bir sıra həssas məsələlərlə bağlı açıqlamalar veriləcək. Bunların arasında su səviyyəsinin qalxması təhlükəsi ilə üzləşən Mikelon kəndinin köçürülməsi və bəzi körpülərinin çökmə təhlükəsi olduğu Sen-Pyer limanının bərpası da var.
Arxipelaq miqyasında nəhəng layihə hesab olunan Mikelonun köçürülməsi işləri ikinci mərhələyə qədəm qoymağa hazırlaşır. Yerli seçkili nümayəndələrin sözlərinə görə, bu mərhələ üçün 25 milyon avro tələb olunur.
Hazırda su səviyyəsinin qalxmasından qorunmaq üçün təxminən 1,5 kilometr məsafədə, daha yüksəklikdə yerləşən yeni ərazidə təxminən 12 ev tikilib. Lakin layihənin uzun müddət davam edəcəyi gözlənilir və o, yerli əhali arasında birmənalı qarşılanmır.
