Azərbaycan, Bakı, 13 sentyabr / Trend , müxbir İ.Xəlilova/ Türkiyənin T.C. Ziraat Bankası A.S gələn ildən 50 faiz iştirak payına malik olduğu AzerTurk Bank vasitəsilə Azərbaycanda kənd təsərrüfatı istehsalının kreditləşməsini artırmağı planlaşdırır, AzerTurk Bank İdarə Heyətinin sədri Mehmet Sami Acarözmen bildirib.
AzerTurk Bank indiyədək kənd təsərrüfatı müəssisələri, dəyirmanlar, fındıq istehsalçılarını (Zaqataladakı zavodlar) maliyyələşdirib. Bu gün bankın ümumi kredit portfelində ($40 mln.) aqromaliyyələşdirmənin payı $5 mln.-a bərabərdir.
"Aqrar sektorun maliyyə ehtiyatlarına olan tələbatını nəzərə almaqla, 2009-cu ildən kənd təsərrüfatı istehsalının kreditləşməsinə başlamaq niyyətindəyik. Belə ki, Azərbaycan bankları risklərin olması ilə əlaqədar bu sahəyə həvəssiz surətdə kredit ayırırlar", - Acarözmen bildirib.
"Ziraat Bankası" Türkiyədə əsasən bu sahədə ixtisaslaşıb. AzerTurk Bank-ın rəhbəri hesab edir ki, Azərbaycanda aqrar sektorda böyük potensial var və bank Rusiya, Fransa bank və şirkətləri, İsrail şirkətlərinin böyük marağını nəzərə alaraq, qısa müddətdə onun maliyyələşdirilməsinə başlamaq niyyətindədir.
AzerTurk Bank 1995-ci il mayın 25-də təsis edilib.
Sentyabrın 13-nə olan cari mübadilə məzənnəsi -- 0,8155 AZN/USD.
Müəlliflə əlaqə saxlamaq üçün elektron ünvan - [email protected]
