Azərbaycan, Naxçıvan, 09 oktyabr/ Trend , müxbir E.Məmmədov/ "Cahan Holding Sənaye - Maliyyə Qrupu Naxçıvan Muxtar Respublikasında iki yeni istehsal xəttini - tütünün fermentasiyası üzrə zavodu və panel radiatorları, dam örtüklərinin istehsalı üzrə müəssisəni istismara verib", - Şirkətlər Qrupu İdarə Heyətinin sədri Vüqar Abbasov bildirib. Zavodların tikintisinə 1 mln. manat sərmayə yatırılıb.
Abbasovun müəssisələrin açılış mərasimində bildirdiyinə görə, müəssisələrin istismara verlməsi ilə əlavə 320 yeni iş yeri açılacaq.
Panel radiator istehsalı müəssisəsində 2 milyon 962 manat dəyərində yeni avadanlıq qurulub. Ümumi sahəsi 2160 kvadratmetr olan müəssisədə ayda 30 min kvadratmetr radiator istehsal ediləcək. Zavodda paslanmayan dəmir, şifer istehsalı xətti də işə salınıb. Yeni xəttin gündəlik istehsalı 4800 kvadratmetrdir. Yeni xətdə eni 105 mm, uzunluğu müxtəlif ölçülərdə, qalınlığı 0,7 mm olan istənilən rəngdə şiferlər hazırlanacaq.
Tütün - fermentasiya zavodunun ümumi sahəsi 1170 kvadratmetr, illik istehsal gücü 2000 ton olacaq. Zavodun fasiləsiz fəaliyyəti üçün bu ildən Muxtar Respublikada tütün plantasiyaları genişləndiriləcək və daimi işlə təmin olunacaq 210 nəfər bu əkin sahələrinə cavabdeh olacaq.
Oktyabrın 9 - na olan cari mübadilə məzənnəsi -- 0,8094 AZN/USD.
Müəlliflə əlaqə saxlamaq üçün elektron ünvan: [email protected]
