Azərbaycan, Bakı, 27 noyabr/ Trend , müxbir S.Babayeva/ "Azərbaycanda bal məhsulunun həcminin 7 min tona çatıdırılması məqsədilə onun istehsalının 3,5 dəfə artırılması üçün potensial var", - Kənd Təsərrüfatı Nazirliyinin heyvandarlıq şöbəsinin rəhbəri Çingiz Fərəcov "Xalq Qəzeti"nə müsahibəsində bildirib.
"2001-ci ildə ölkəmizdə 57 min arı ailəsi vardısa, hazırda onların sayı 126 mini ötür. Lakin sayı 500 minədək artırmaq olar ki, bu da ölkədə bal istehsalını 7 min tona çatdırmağa imkan verəcək", - Fərəcov əlavə edib.
Onun sözlərinə görə, Azərbaycanda arıçılıq sahəsinə böyük maraq var.
"Bu il arıçılıq məhsullarının sərgi-yarmarkasında, 2007-ci illə müqayisədə 2 dəfə çox - 400 arıçı təmsil olunmuşdu", - şöbə rəhbəri bildirib.
Fərəcov hesab edir ki, layihəsi artıq parlamentdə müzakirə edilən arıçılıq haqqında qanun layihəsinin qəbulu ölkədə bu sahədə vəziyyəti xeyli yaxşılaşdırmağa imkan verəcək və arıçılıq məhsulları istehsalının artımına gətirəcək.
"Qanun qəbul edildikdən sonra, saxta bal istehsalçıları məsuliyyətə cəlb ediləcək", - Kənd Təsərrüfatı Nazirliyinin nümayəndəsi bəyan edib.
Arıçılıq məhsullarının yüksək keyfiyyəti və təhlükəsizliyinin təmin edilməsi üçün, bu məhsulların standartlaşdırılması və sertifikatlaşdırılması təklif olunur.
Azərbaycanda arıçılıq, əsasən, Daşkəsən, Lerik, Yardımlı rayonlarında inkişaf edib.
Müəlliflə əlaqə saxlamaq üçün elektron ünvan: [email protected]