Azərbaycan, Bakı, 20 dekabr/ Trend , müxbir N.İsmayılova/ Azərbaycanın Dövlət Əmlakının İdarə Edilməsi üzrə Dövlət Komitəsi Saatlı-Pambıq Səhmdar Cəmiyyətinin səhmlərinin 30,03 faizinin satışına sərmayə müsabiqəsi elan edib, - Dövlət Komitəsindən şənbə günü bildiriblər.
Müsabiqədə Azərbaycanın fiziki və hüquqi şəxsləri və xarici sərmayədarlar iştirak edə bilər. İddiaçılar pambıq emalının təkmilləşdirilməsi və onun satış həcminin genişləndirilməsi üzrə sərmayə proqramını təqdim etməlidirlər.
Müsabiqədə iştirak etmək istəyənlər sərmayə təkliflərinin beş faizinə bank zəmanəti və dövlət büdcəsinə 283 min manat ödəmək barədə təklifləri təqdim etməlidirlər.
Saatlı-Pambıq pambığın tədarükü, emalı və satışı ilə məşğul olur. Sahəsi 42,74 ha olan müəssisə Saatlı rayonunun Sarıcalar kəndində yerləşib.
SC - nin Nizamnamə kapitalı 3,47 mln. manat təşkil edir. Bu məbləğdə hər birinin nominal dəyəri 2 manat olan 1733164 səhm buraxılıb. Müsabiqənin predmeti nominal dəyəri 1,04 mln. manat olan 520 477 səhmdir.
2008 - ci il noyabrın 1-nə olan vəziyyətə görə, müəssisənin 4,3 mln. manat məbləğində, əmək haqqı üzrə 36,8 min manat borcu var. Müəssisənin debitor borcları 2,74 mln. manat təşkil edir. Xammala və göstərilmiş xidmətlərə görə ödəniş borcu 4,27 mln. manata çatır.
Müəssisə 1977 - cü ildən fəaliyyət göstərir, əməkdaşlarının sayı 73 nəfərdir.
İddiaçılar 2009 - cu il fevralın 3-dək saat 10:00-dan17:30 ərzində Bakı şəh., Y.Səfərov küç, 20 ünvanında müsabiqənin tələbləri, sərmayə planı ilə tanış ola və əlavə məlumat ala bilərlər. Sənədlər və təkliflər 3 fevral, saat 10:00- dan17:30-dək qəbul olunur.
Təkliflərə 2009-cu il fevralın 5-də saat 10:30- dan başlayaraq,müsabiqə komissiyası tərəfindən Dövlət Əmlakının İdarə Edilməsi üzrə Dövlət Komitəsinin binasında baxılacaq.
Dekabrın 20-nə olan cari mübadilə məzənnəsi -- 0,8013 AZN/USD.
Müəlliflə əlaqə saxlamaq üçün elektron ünvan: [email protected]