Azərbaycan, Bakı, 25 dekabr/ Trend , müxbir N.İsmayılova/ Azərbaycan Milli Bankı (AMB) üç bank olmayan kredit təşkilatının - ""Qayğı" kredit ittifaqı", "Turan" və "Balakən" MMC-nin lisenziyalarını ləğv edib, - AMB-dən cümə axşamı bildiriblər.
2003 - cü il oktyabrın 31-də alınmış lisenziya əsasında İmişlidə yaradılmış ""Qayğı" kredit ittifaqı"ndan lisenziyası təşkilatın AMB-yə iki hesabat dövrü üzrə hesabatları əsassız olaraq təqdim etməməsi, illik auditdən keçmədiyinə görə ləğv edilib. 2005 - ci il 15 fevral tarixli lisenziya ilə yaradılmış "Turan" (Şəmkir rayonunda təsis edilib) və 2003 - cü il 31 oktyabr tarixli lisenziya ilə yaradılmış "Balakən" (Balakən rayonu" kredit ittifaqlarının lisenziyaları, AMB-nin çoxsaylı xəbərdarlıqlarına baxmayaraq, iqtisadi tənzimləmə normalarının dövrü pozulması ilə bağlı ləğv edilib.
Hər üç kredit təşkilatına ləğvetmə komissiyaları yaratmaq və ləğvetmə üzrə zəruri işləri həyata keçirmək tapşırılıb.
AMB-nin oktyabrın 1-nə olan məlumatına görə, Azərbaycanda 97 bank olmayan kredit təşkilatı, o cümlədən 78 kredit ittifaqı fəaliyyət göstərib.
"Kredit ittifaqları haqqında" Qanuna əsasən, bu bank olmayan kredit təşkilatları 11 nəfərdən ibarət tərkibdə yaradılır və öz üzvlərinin maliyyələşdirilməsi vasitəsilə kredit əməliyyatları həyata keçirirlər. Banklar kimi onlar da hər rübdə Milli Bank qarşısında hesabat verməlidirlər. Qanun kredit ittifaqlarına əhalidən əmanətlər cəlb etməyi qadağan edir.
2003 - cü ilin sonunda beş kredit ittifaqı və bir neçə fiziki şəxs Azərbaycan Kredit İttifaqları Assosiasiyasının (AKİA) yaradılması barədə qərar qəbul ediblər. Sonradan ölkə ərazisində fəaliyyət göstərən kredit təşkilatlarının əksəriyyəti onlara qoşulub. Hazırda Assosiasiya 51 kredit ittifaqını birləşdirir.
Müəlliflə əlaqə saxlamaq üçün elektron ünvan: [email protected]
