Türkmənistan, Aşqabad, 06 yanvar / Trend , müxbir E.Həsənov/ Son iki il ərzində Türkmənistan və ÇXR arasında mal dövriyyəsi praktiki olaraq ilbəil iki dəfə artır, - Çinin Türkmənistandakı səfiri U Xunbin Neytral Türkmənistan qəzetinə müsahibəsində bildirib. Müsahibə qəzetdə çərşənbə axşamı dərc olunub.
Onun sözlərinə görə, belə templər özünəməxsus bir rekorddur.
Çin Türkmənistana yüksək texnoloji, elektron-mexaniki məhsullar, metal məhsulları, geyim, ayaqqabı və digər mallar ixrac edir, Türkmənistandan isə kənd təsərrüfatı, dağ-mədən, toxuculuq məhsulları və bəzi xam material növlərini idxal edir.
"Ötən ilin martınadək tərəflər podrat tikinti və iş əməkdaşlığı haqqında ümumi həcmi 400 mln. ABŞ dollarından çox olan 30-dan çox müqavilə imzalayıblar", - çinli diplomat bildirib və əlavə edib ki, ÇXR-in şirkətləri neft-qaz, toxuculuq, telekommunikasiya, tikinti və nəqliyyat sahələrində əməkdaşlıq edirlər.
Çinin SİNOPEC neft-kimya şirkəti neft quyularının əsaslı təmiri üzrə iş aparır, Türkmənistanda quruda kəşfiyyat və xammal hasilatına operator lisenizyası almış Çinin Mili Neft-qaz Şirkəti (CNPC) isə cənub-şərqi Türkmənistanda qaz quyularının qazılması ilə məşğul olur. "Xuavey" şirkəti telekommunikasiya avadanlığı ilə təchizatı həyata keçirir, CİTİC sərnişin vaqonları ixrac edir.
Hazırda tikinti materiallarının istehsalı, kimya sənayesi, kommunikasiya infrastrukturunun tikintisi sahələrində yeni layihələrə dair danışıqlar aparılır. CHİNAROAD, SİNOMACH, COMPLANT türkmən tərəfi ilə Şimal-Cənub dəmir yolu magistralının tikintisi, Fərab şəhərində Amudərya üzərində körpünün salınması, Aşqabadda şüşə kombinatının, Karlük yatağında kaliumlu gübrələrin istehsalı üzrə kompleksin tikintisi barədə danışıqlar aparırlar.
Xunbin bildirib ki, Türkmənistan-Çin transmilli qaz magistralının tikintisi iki dövlətin münasibətlərini "dərinləşdirəcək". Onun sözlərinə görə, "bütün dünya ictimaiyyətinin çəkilməsini diqqətlə izlədiyi" bu qaz magistralı 2009-cu ilin sonunda başa çatdırılacaq. Türkmənistan qarşıdakı 30 il ərzində Çini ildə 30 mlrd. kubmetr həcmində təbii qazla təchiz edəcək.
""Əsrin layihəsi" nəinki iki ölkənin, həm də ümumilikdə regionun iqtisadi inkişafı üçün strateji əhəmiyyət kəsb edir", - səfir deyib.
Müəlliflə əlaqə saxlamaq üçün elektron ünvan: [email protected]
