Azərbaycan, Bakı, 09 yanvar / Trend ,
müxbir N.İsmayılova/
Dünya maliyyə böhranının
təsiri altında Azərbaycan bazarında dünyanın
ən böyük avtomobil istehsalçılarının
satış həcmi azalmağa başlayıb. Sorğunun
nəticələri bunu göstərir.
Bakının avtosalonlarından bildiriblər ki, avtomobillərin satış həcmlərinin azalmasına Azərbaycan banklarının kreditlərin verilməsi müddətini azaltması da təsir göstərib. Lakin Azərbaycanın avtodilerlərinin ötən ilin sonundan apardıqları endirim aksiyaları əksərən tələbatın artmasına yönəlməyərək, ötən ildən ölkə avtosalonlarında qalmış avtomobillərin satışı ilə bağlıdır.
Subaru avtosalonundan bildiriblər ki, bu markalı avtomobillərə tələbat 30 - 40 faiz azalıb.
"Hələ yayda avtomobil satışlarının sayı hər ay 60 -70 maşın olurdusa, yalnız dekabrda cəmi 30 avtomobil satılıb", - salondan qeyd ediblər.
Avtomobil satışlarının azalması payızda başlayıb. Sentyabrda satış 50, oktyabrda 42 avtomobilədək azalıb.
Subaru ötən ildən Azərbaycanda endirim kampaniyası aparır. Bu markalı bütün avtomobbillərə endirim 10 faiz təşkil edir.
Lakin avtosalondan bildirdikləri kimi, yaxın iki həftə ərzində bu aksiyanın dayandırılması və avtomobillərin qiymətlərinin təxminən 10 -15 faiz artırılacağı gözlənilir.
"Artırma həm firmanın daxili siyasəti, həm də hazırda ienin məzənnəsinin bahalaşması ilə bağlıdır", - salondan deyiblər.
Salon Bank Respublika ilə əməkdaşlıq edir. Bank 30 faiz ilkin ödənişlə beş il müddətinə və illik 21 faiz dərəcə ilə avtomobilin alınmasına kredit verir. Əvvəllər kreditlər 20 faiz ilkin ödəniş, illik 22 faiz dərəcə və beş il müddətinə verilirdi.
Azərbaycanda bir distribüterlə təmsil olunmuş Audi və Volkswagen-nin avtosalonlarından da, dünya maliyyə böhranının Azərbaycan bazarında həmin markalı avtomaşınlarının satış həcminə təsirini təsdiqləyiblər.
"Son aylar ərzində avtomobillərə tələbat üç dəfə azalıb", - avtosalondan bildiriblər.
Ötən ay Volkswagen markalı avtomobillərin satışı ayda təxminən 30 maşın təşkil edirdisə, indi bu rəqəm ayda 10 avtomobilədək azalıb. Daha çox Audi-nin satış həcmləri azalıb ki, bu da, Volkswagen markalı avtomobillərin qiyməti ilə müqayisədə, onların qiymətinin yüksək olması ilə bağlıdır.
Salon hazırda endirim kampaniyası aparır və bütün markalı avtomobillərin qiyməti 10 faiz azaldılıb.
Salon AccessBank - la əməkdaşlıq edir. Bank avtomobilin alınmasına, ilkin ödəniş 30 faiz olmaqla, iki il müddətinə, illik 26 faiz dərəcə ilə kredit verir.
Hyundai-ın avtosalonundan bildiriblər ki, hələ ki, bu markalı maşınların qiymətinin azalması gözlənilməsə də, avtomobillərə tələbatın bir qədər azaldığı müşahidə olunur.
"Satılan avtomobillərin orta sayı gündə 10 - dan 20 - dək dəyişir. Bununla yanaşı, salonun hər ay satdığı avtomobillərin minimal sayı 300 - ə bərabərdir", - salondan vurğulayıblar.
Hazırda avtomobillərə tələbatın artırılması üçün satış həcmini sabitləşdirməyə kömək edən müxtəlif aksiyalar keçirilir.. Aksiyalara görə, Hyundai markalı müxtəlif avtomobillərin alıcılarına televizor, monitor və maşın aksessuarları təqdim olunur. Alınan avtomobilin qiymətinin yarısını dərhal ödəmiş müştərilərə faizsiz kredit də təqdim edir.
Salon Bank of Baku ilə əməkdaşlıq edir və maşınlar kreditə alınarkən, ilik faiz dərəcəsi 24 faiz olmaqla, ilkin ödəniş 25 faiz təşkil edir. Avtokredit üç il müddətinə verilir.
Müəlliflə əlaqə saxlamaq üçün elektron ünvan: [email protected]