Azərbaycan, Bakı, 19 yanvar/ Trend , müxbir N.İsmayılova/
2008 - ci il ərzində Azərbaycanda qeydiyyatdan keçmiş hüquqi şəxslərin sayı 8,8 faiz artıb və 2009 - cu il yanvarın 1- nə 86 117 təşkil edib, - Dövlət Statistika Komitəsindən bildiriblər. Hesabat dövründə 6 867 yeni müəssisə yaradılıb, 440 müəssisə və təşkilat fəaliyyətini dayandırıb.
Ləğv edilmiş müəssisələrin 10 faizi kənd və meşə təsərrüfatı, 15,5 faizi - topdan və pərakəndə satış, avtomobil, məişət məmulatları və şəxsi istifadə predmetlərinin təmiri, 11,4 faiz - daşınmaz əmlak, icarə və istehlakçılara xidmətlərin göstərilməsi, 11,1 faiz - digər kommunal və sosial xidmətlərin payına düşür.
Bununla yanaşı, 222 dövlət mülkiyyətində, 181 şəxsi mülkiyyətdə olan, 27 xarici və üç birgə müəssisə ləğv edilib.
Hesabat dövründə yaradılmış müəssisələrin böyük hissəsi topdan və pərakəndə satış, avtomobil, məişət məmulatları və şəxsi istifadə predmetlərinin təmiri sahəsinin payına düşüb. Tikinti sektorunda yeni müəssisələrin payı 19,8 faiz, daşınmaz əmlakla xidmətlər sahəsində - 15 faiz, kommunal xidmətlər - 22,4 faiz, kənd təsərrüfatında - 6,1 faiz, emaledici sənayedə - 5,9 faiz və s. təşkil edib.
Vergilər Nazirliyi vasitəsilə "vahid pəncərə" qeydiyyat prinsipinin tətbiqindən sonra qeydiyyatda alınan müəssisələrin sayı artıb. Son beş il ərzində hər il, orta hesabla, təxminən 4 min müəssisə qeydiyyatdan keçirdisə, 2008 - ci ildə bu rəqəm 6,8 minə bərabər olub.
Müəlliflə əlaqə saxlamaq üçün elektron ünvan: [email protected]