Azərbaycan, Bakı, 02 mart / Trend , müxbir N.İsmayılova / Latviyanın Kommersiya Bankları Assosiasiyası və Azərbaycanın Banklar Assosiasiyası (ABA) əməkdaşlıq planı layihəsi hazırlayacaq. Bu barədə bazar ertəsi Latviya Assosiasiyasının nümayəndəsi, Parex Bank-ın Azərbaycandakı nümayəndəliyinin rəhbəri Andreys Krivans bildirib.
"Banklar assosiasiyaları gələcəkdə həyata keçiriləcək fəaliyyətlərini də razılaşdırmaq niyyətindədir və martda əməkdaşlıq planı layihəsi artıq hazır olacaq", - deyə Krivans bildirib.
Assosiasiyalar arasında əməkdaşlıq barədə danışıqlar fevralın 19-da Bakıda baş tutub.
"Əməkdaşlıq sahələri Azərbaycan bankları personallarının Latviya Kommersiya Bankları Assosiasiyaları yanındakı tədris mərkəzində təhsil almasını, həmçinin yeni texnologiyaların tətbiqini əhatə edir", - deyə Krivans vurğulayıb.
Onun sözlərinə görə, bu barədə daha ətraflı plan çərçivəsində hazırkı əməkdaşlığın istiqamətlərinin müəyyən edilməsindən sonra danışmaq mümkün olacaq. Lakin danışıqların aparılmağa başlandığı Azərbaycan bankları Latviya Assosiasiyası ilə əməkdaşlıqda maraqlı olduqlarını ifadə ediblər. Krivans bu bankların adlarını açıqlamaqdan hələ ki, imtina edib.
"Bizim bank strukturumuz tərəfindən hazırlanan bir çox texnologiyalar Azərbaycanda da uğurla istifadə oluna bilər, - deyə nümayəndəlik rəhbəri bildirib. - Qlobal maliyyə böhranı vəziyyətində xüsusi diqqət ölkələrin bank sektorlarının risklərdən təhlükəsizliyinin təmin edilməsinə yönəldiləcək və assosiasiyalar arasında əlaqlərin qurulması buna yardım göstərəcək".
Məqalə müəllifi ilə əlaqə ünvanı: [email protected]
