Azərbaycan, Bakı, 14 mart / Trend , müxbirlər İ.Xəlilov, E.İsmayılov /
Yarım il ərzində Ələt Qəsəbəsindəki beynəlxalq dəniz limanının quru və su hissələrində tikinti işlərinin aparılması məqsədi ilə tender elan olunacaq, - Azərbaycanın nəqliyyat nazirinin müavini Musa Pənahov bildirib.
Hazırda Ələt qəsəbəsində beynəlxalq dəniz limanının inşasının layihələndirilməsinə dair keçirilən tenderdə qalib olmuş Hollandiya şirkəti "Royal Haskoning" layihələndirmə işlərini aparır.
"Layihələrin hazırlanması mərhələlərlə həyata keçiriləcək, yəni onlar (Royal Haskoning) bizə su hissəsini, sahil ərazisini təqdim edəcək və layihələr mərhələlərlə hazırlandıqdan sonra tikinti tenderləri elan olunacaq. Düşünürəm ki, bunların hamısı beş-altı il ərzində həyata keçiriləcək", - deyə Pənahov bildirib.
Onun sözlərinə əsasən, layihənin qiymətləndirilməsi şirkəti tərəfindən layihə işlərinin tam başa çatmasından sonra görüləcək.
Ələt qəsəbəsindəki beynəlxalq dəniz limanı multimodal olacaq. Belə ki, gələcəkdə bu ərazidə loqistika mərkəzindən başqa, azad iqtisadi zonanın yaradılması planlaşdırılır.
Ələt qəsəbəsində yeni beynəlxalq dəniz limanının inşası üç mərhələdə həyata keçiriləcək və 2015- ci ilə başa çatacaq. Layihənin 2008-2010-cu illəri əhatə edən birinci mərhələsi iki bərə, konteynerlərin, "ro-ro" tipli gəmilərin və adi (universal) quru yük gəmilərinin qəbulu üçün üç yük körpüsünün tikintisini nəzərdə tutur. Layihənin ikinci mərhələsi 2011-2013-cü illəri əhatə edir və daha üç, üçüncü mərhələ isə (2014-2015-ci illər) əlavə olaraq 2 yük körpüsünün tikilməsini nəzərdə tutur. Limanın inşası layihəsi 400 mln. dollardan çox qiymətləndirilir.
Royal Haskoning mühəndis tikinti-layihələndirmə şirkəti Niderlandda 1881-ci ildə yaradılıb.
Məqalə müəllifi ilə əlaqə ünvanı: [email protected]