Azərbaycan, Bakı, 06 aprel / Trend , müxbir Ü.İsmayılova /
Trend -ın "Unileasing" QSC lizinq şirkətinin İdarə Heyətinin sədri Zəki Sadıqovla müsahibəsi.
- 2008-ci il dünya maliyyə böhranının başlanğıcı kimi yadda qalıb. Öyrənmək istərdik ki, bu il Azərbaycan lizinq bazarı üçün necə oldu?
- Azərbaycan lizinq bazarı 2008-ci il ərzində həm kəmiyyət, həm də keyfiyyət baxımından xeyli dəyişikliyə uğrayıb. Bunu lizinq şirkətlərinin sayının artımı və ümumi lizinq portfelinin həcminin artımı ilə müşahidə etmək olar. Ötən il kiçik layihələrin kiçik nizamnamə kapitallı özəl lizinq şirkətlərin yaradılması yolu ilə orta sahibkarlıq tərəfindən maliyyələşdirilməsi tendensiyası müşahidə olunub. Bu tendensiya ilə yanaşı, daxili bazarda şəriət prinsipləri ilə maliyyə xidmətləri göstərəcək lizinq şirkəti də peyda olub. Bundan başqa öz lizinq şirkətlərini yaratmaq istəyi ilə bir neçə bank çıxış edib. Bu proses bazarın potensialının və yerli sahibkarlar üçün böyük perspektivin varlığını göstərir.
Kəmiyyət artımı ilə yanaşı, ötən il bazarda keyfiyyət artımı da nəzərə çarpırdı. Ancaq dünyada müşahidə olunan qlobal maliyyə böhranı yerli lizinq şirkətlərindən də yan keçməyib. Bu tendensiyanı bazardakı durumu analiz edərkən görmək olar. Bazarda portfel artımı il ərzində 76 faizə çatıb. Ancaq ötən illərdə bu rəqəm 100 faizə qədər olub.
Belə ki, 2005-ci ilin yekunlarına əsasən, bazarın portfel həcmi 29,7 milyon manat, 2006-cı ildə 61,9 milyon manat (artım 108,4 faiz), 2007-ci ildə 122,1 milyon manat (artım 97,2 faiz) və 2008-ci ilin yekunlarına görə bazarın həcmi 210 milyon manat olub. Artım səviyyəsi 76 faizdir.
- Maliyyə böhranı sizin şirkətin fəaliyyətinə təsir edibmi?
- Qeyd etmək lazımdır ki, Azərbaycanın uğurlu iqtisadi siyasəti hesabına dünya maliyyə böhranı respublikaya elə də toxunmayıb, ancaq hər halda onun təsiri hiss olunur.
Bu şərtlərdə ölkənin maliyyə strukturları qarşısında müxtəlif layihələrin maliyyələşdirilməsi və yeni maliyyə resurslarının axtarışı məsələləri daha kəskin durur.
Ötən ilin sonunda bizim şirkət Amerikanın Eximbank-ı ilə 2,5 milyon dollar həcmində müqavilə bağlayıb. Bu müqavilənin köməyi ilə respublika sahibkarları Amerika məhsullarının sərfəli şərtlərlə lizinqə almaq imkanı qazanıb. Bununla yanaşı, Unileasing yerli banklardan birinin kredit xəttini kiçik tonnajlı ISUZU yük avtomobillərinin lizinqi üzrə layihənin maliyyələşdirilməsinə cəlb edə bilib.
Bu günlərdə Almaniyanın Landesbank-ı ilə 4 milyon dollar həcmində müqavilə imzalanıb. Hazırda şirkətin mütəxəssisləri Almaniya istehsalı olan avadanlıqların lizinqi üzrə xüsusi şərtlərin hazırlanması üzərində çalışırlar. Bu yolla yaxın zamanda biz yerli sahibkarları yeni layihələrlə sevindirməyi planlaşdırırıq.
- Sizin şirkət Lizinq Şirkətləri Assosiasiyasının təsisçilərindən biridir. Assosiasiyanın bugünkü fəaliyyəti haqda öyrənmək istərdik?
- Yaxın zamanlarda Beynəlxalq Maliyyə Korporasiyasının həyata keçirdiyi "Azərbaycanda lizinqin inkişafı" layihəsi başa çatır. Bundan sonra yaradılan bu sistemin fəaliyyətinin dəstəklənməsi ilə Azərbaycan Lizinq Şirkətləri Assosasiyası məşğul olacaq. O cümlədən Assosasiya tərəfindən lizinq şirkətlərinin mütəmadi monitorinqi, şirkətlər arasında informasiya mübadiləsi aparılacaq, problemli müştərilər üzrə vahid verilənlər bazası yaradılacaq və yerli bazarda lizinqin populyarlaşdırılması məqsədilə başqa layihələr həyata keçiriləcək.
Lizinq şirkətlərinin qarşısında duran problemlərin həlli üçün yaxın gələcəkdə Azərbaycan Lizinq Şirkətləri Assosasiyası dövlət strukturları ilə dəyirmi masa keçirməyi planlaşdırır. Orada müxtəlif məsələ spektri, o cümlədən lizinq şirkətləri tərəfindən gətirilən məhsul və xidmətlərin ƏDV xərclərinin örtülməsi müzakirə ediləcək.
Məqalə müəllifi ilə əlaqə ünvanı: [email protected]
