Azərbaycan, Bakı, 14 may / Trend , müxbir N.İsmayılova /
İqtisadi Tədqiqatlar Mərkəzinin hesablamalarına görə, son 10 ildə ilk dəfə olaraq Azərbaycanda müşahidə olunan deflyasiyanın səviyyəsi apreldə illik hesablamalarla 1,47 faiz təşkil edib. Bu barədə cümə axşamı İqtisadi Tədqiqatlar Mərkəzinin sədr müavini Vüsal Qasımlı bildirib. Ötən ilin aprelində ölkədə 5,34 faizlik inflyasiya müşahidə olunub.
Tədqiqatlar Macarıstanın İnstitusional Yardım Fondunun "Açıq Cəmiyyət İnstitutu" layihəsi çərçivəsində "Alternativ inflyasiya səviyyəsinin hesablanması" proqramı üzrə aparılır.
"Hazırda ölkədə müşahidə olunan deflyasiya bizim proqnozlarımıza görə, daha iki-üç ay uzanacaq. Avqust-sentyabrda qiymətlər sabitləşəcək, ilin sonunadək isə ölkədə inflyasiya artmağa başlayacaq", - deyə Qasımlı bildirib.
Aprel ərzində Azərbaycanda istehlakçı qiymətləri indeksi martda qeydə alınan 0,84 faizə nisbətdə 0,36 faiz azalıb. Bakıda 0,08 faiz, regtonlarda isə 0,64 faiz deflyasiya müşahidə olunub.
Martda olduğu kimi ən yüksək deflyasiya 0,76 faiz səviyyəsində qeyri-ərzaq mallarında müşahidə olunub. Aprel ərzində qida məhsullarının qiyməti 0,27 faiz, xidmət tarifləri isə 0,07 faiz azalıb.
Mərkəzin hesablamalarına görə, dörd ay ərzində Azərbaycanda istehlakçı qiymətləri indeksi 3,51 faiz azalıb, ötən ilin aprel ayı ilə müqayisədə isə 1,47 faiz enmə müşahidə olunub. Apreldə ərzaq məhsullarının qiyməti (illik hesablamalarla) 4,92 faiz ucuzlaşıb. Qeyri-ərzaq malları və xidmət tarifləri isə müvafiq olaraq 1,69 və 3,88 faiz bahalaşıb.
Aparılan statistik müşahidə nəticəsində apreldə qeyri-ərzaq malları arasında ən çox ucuzlaşma tikinti materiallarında 2,92 faiz, geyim və ayaqqabılarda 0,73 faiz, təsərrüfat mallarında 0,23 faiz səviyyəsində müşahidə olünüb.
Mərkəz ekspertlərinin hesablamalarına görə, hazırda iş qabiliyyətli əhali üçün minimal istehlakçı səbəti 103,36 manata, təqaüdçülər üçün 81,69 manata, 15 yaşınadək olan uşaqlar üçün 96,58 manata bərabərdir.
"Deflyasiya istehlakçı səbətinin həcmini azaldıb və əhalinin alıcılıq qabiliyətini yaxşılaşdırıb", - deyə Qasımlı bildirib.
Mayın 14-nə olan rəsmi məzənnə 0,8036 AZN/USD təşkil edir.
Məqal məllifi ilə əlaqə ünvanı: [email protected]
