Gürcüstan, Tbilisi, 26 may / Trend , müxbir N.Kirtsxaliya /
Bu ilin yanvar-aprel aylarında Gürcüstanın xarici ticarət dövriyyəsi ötən ilin analoji dövrü ilə müqayisədə 34,9 faiz azalaraq, 1 595 milyon dollara çatıb. O cümlədən ixrac 33 faiz (311,3 milyon dollar), idxal isə 35,3 faiz (1 283,7 milyon dollar) azalıb.
Gürcüstanın İqtisadi İnkişaf Nazirliyinin stastistika departamentinin məlumatına görə, mənfi ticarət balansı da, həmçinin 36 faiz azalaraq 972,4 milyon dollar təşkil edib. Ticarət əməliyyatları 92 ölkə ilə aparılıb. Müsbət ticarət balansı 56 milyon dollar təşkil edib. Burada 19 ölkə ilə ticarət aparılıb.
Bu müddətdə Gürcüstanın Aİ ölkələri ilə ticarət dövriyyəsi 34,9 faiz azalaraq 439,7 milyon dollar təşkil edib. O cümlədən ixrac 76,7 milyon dollar, idxal 363 milyon dollar təşkil edib.
MDB ölkələri ilə xarici ticarət dövriyyəsi 40,1 faiz azalaraq 489,4 milyon dollara düşüb. Burada idxal 379,8 milyon dollar olub.
Gürcüstanın ən böyük ticarət tərəfdaşı Türkiyədir. Onunla dövriyyə 310,3 milyon dollar olub ki, bu da ötənilki göstəricidən yalnız 4,3 faiz azdır. O cümlədən ixrac 3,3 faiz düşərək 62,8 milyon dollara, idxal isə 11,8 faiz azalaraq 247,5 milyon dollara çatıb.
İkinci yerdə Azərbaycandır. Onunla dövriyyə 34,9 faiz azalaraq 161, 5 milyon dollara çatıb. Üçüncü yerdə Ukraynadır (azalma 37,7 faiz - 144,9 milyon dollar).
Məqalə müəllifi ilə əlaqə ünvanı: [email protected]