Azərbaycan, Bakı, 26 avqust / Trend , müxbir İ.Xəlilova /
"Zamin Bank" ASC Mərkəzi Bank yanında fəaliyyət göstərən Azərbaycan İpoteka Fondunun (AİF) xətti ilə maliyyələşmənin bərpasından - 2009-cu ilin iyunundan etibarən ümumi məbləği 2,595 milyon manat olan 70 ipoteka krediti verib. Bu barədə çərşənbə günü bankın İdarə Heyətinin sədri Zəhra Quliyeva məlumat verib.
"Bu vəsaitdən 470 min manat sosial ipotekaya verilib. Qalanı isə adi ipotekanın payına düşür, - Quliyeva deyib. - Biz AİF-in şərtlərinə uyğun olan bütün ərizələri təmin etməyə hazırıq, lakin bu, maliyyələşmənin həcmindən asılı olacaq".
Onun sözlərinə görə, bu günə 440 min manatlıq ərizələrin maliyyələşməsi üçün imkan var. Onların təmin edilməsi nəticəsində Zamin Bankın ipoteka portfeli 3 milyon manatı ötəcək.
Azərbaycanda verilən adi ipoteka kreditinin maksimal məbləği 50 min manatdır. Belə kreditlər 8 faizlə 25 il müddətinə verilir. Sosial ipotekanın ən yüksək məbləği isə 35 min manatdır və 4 faizlə 30 il müddətinə verilir. Adi və güzəştli kreditlər üçün ilkin ödəniş 15 faizdir.
Dövlət büdcəsində ipotekanın güzəştli maliyyələşdirilməsi üçün 14 milyon manat nəzərdə tutulub. Bundan əlavə, AİF 55 milyon manatlıq istiqrazlar buraxıb. Bunun 30 milyon manatı artıq yerləşdirilib.
2007-ci ilin yayında ipoteka kreditləşməsinin dayandırılmadan bərpasına qədər Zamin Bank xüsusi proqram üzrə ipoteka kreditlərinin verilməsini davam etdirib. Bankın ipoteka kreditlərinin şərtləri belə olub: illik faiz dərəcəsi 10-15%, müddət 15 ilədək. Bank bir müştəriyə 200 min manatadək kredit verə bilər.
Üstünlük ondan ibarətdir ki, bank əməkhaqqını təsdiq edən arayış tələb etmir. Bu da AİF xətti ilə kredit alınması zamanı mütləq tələbdir.
Kreditlər tikinti şirkəti ilə bağlanmış müqavilə əsasında yeni tikililərdəki mənzillərə görə verilir. Bu da ipoteka kreditinin qaytarılmaması zamanı riskləri azaldır.
Zamin Bankın xüsusi proqram üzrə ipoteka portfeli 10 milyon manata çatır.
Bank Azərbaycan ipoteka bazarında durğunluğun davam etməsini nəzərə alaraq ipoteka kreditləşməsi üzrə xüsusi proqramı keçən ildən tətbiq edir.
Avqustun 26-na olan rəsmi məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]
