Azərbaycan, Bakı, 01 oktyabr / Trend /
Bu il ərzində SOCAR Gas Supply Company (Azərbaycan Respublikası Dövlət Neft Şirkətinin törəmə müəssisəsi) Gürcüstana 494,5 milyon kubmetr "sosial" qaz tədarük edib.
Ümumi tədarükün 37 faizi (183,8 milyon kubmetr) ARDNŞ-nin tədarük etdiyi şəxsi qazın payına, 12 faizi (61,3 milyon kubmetr) Rusiya tərəfindən Gürcüstana tranzit əməliyyatlarına görə verilən qazın payına, 42 faizi (206,7 milyon kubmetr) Gürcüstanın "Şahdəniz" yatağından əldə etdiyi qazın payına düşür. 9 faiz (42,7 milyon kubmetr) isə Gürcüstanın tranzit əməliyyatlarına görə Cənubi Qafqaz qaz kəməri ilə Türkiyədən aldığı qazın payına düşür.
Keçən il ARDNŞ və Gürcüstan hökuməti Gürcüstanın Kaxetiya, Msxeta-Mtianeti, Şida, Kvemo-Kartli, Acariya, Quriya, İmeretiya, Sameqrelo regionlarını əhatə edən 30 qazpaylayıcı təsərrüfatın və qazpaylayıcı şəbəkənin idarəyə verilməsi haqqında razılaşma imzalayıblar. Bu şəbəkələr 24 şirkət tərəfindən istismar edilib. Həmçinin Gürcüstan hökuməti tərəfindən müəyyən edilən abunəçilərin sosial qrupları üçün qiymətlərin 5 il müddətinə dəyişməz qalması şərti ilə qaz tədarük edilməsinə dair razılaşma imzalanıb.
Bu ilin aprel ayında SOCAR Energy Georgia azərbaycanlıların kompakt yaşadığı Marnueli rayonunda qazpaylayıcı şəbəkələri istifadəyə götürüb. Marnueli qazpaylayıcı şəbəkələri SOCAR Energy Georgia tərəfindən Gürcüstanda istifadəyə götürülən 31 qaz təsərrüfatıdır.
Üçillik investisiya proqramı çərçivəsində bu şəbəkənin istehlakçılarının sayını 60 min nəfərdən 150 nəfərədək artırmaq planlaşdırılır. İlk il çərçivəsində ümumi uzunluğu 800 kilometrədək olan qazpaylayıcı şəbəkələr tikiləcək. Birinci investisiya ili çərçivəsində qazpaylayıcı şəbəkələrin inkişafına 28,6 milyon manatdan çox investisiya qoyulub.
