Bakı, Azərbaycan, 16 oktyabr / Trend , müxbir Ü.İsmayılova/
Yanvar-sentyabr aylarının fəaliyyət yekununa görə, Azərbaycanın iri sığotrta şirkətlərindən biri olan Atəşğah-ın sığorta haqları 10 milyon manatdan artıq olub, şirkətin İdarə Heyətinin sədri Azər Əliyev deyib. Şirkətin bu dövr ərzində ödəmələri 3 milyon manatdan artıq olub.
Onun sözlərinə görə, 2009-cu ilin yanvar-sentyabr aylarında olan sığorta haqlarının məbləği 2008-ci ilin 9 ayı ərzində şirkətin topladığı məbləğdən azdır. Lakin Əliyev hesab edir ki, "bu normaldır, çünki şirkət ilin sonuna qədər yığılma planını 12 milyon manat nəzərdə tutub. 2008-ci ildə bu göstərici 15 milyon manat olub".
"Düşünürəm ki, biz ilin sonunadək qoyulmuş planı yerinə yetirəcəyik", - bu həftə Azərbaycan Sığortaçılar Assosiasiyasının sədri seçilən Əliyev deyib.
Şirkətin başçısı deyib ki, cari ilin fəaliyyət yekununa görə, Atəşgah sığorta şirkəti 600 min manat həcmində mənfəət əldə etməyi gözləyir. Bu məbləğ nizamnamə kapitalının artırılmasına yönəldiləcək.
Atəşgah Sığorta şirkəti 1996-cı ildə yaradılıb. Şirkətin səhmdarları: I.S.R. Holding Ltd (49 faiz), ARDNŞ (30 faiz) və RAN-Eksim şirkəti (21 faiz).
