Azərbaycan, Bakı, 22 oktyabr / Trend , müxbir İ.Xəlilova/
Azərbaycan hökuməti bu günə qədər beynəlxalq maliyyə institutları və xarici kredit təşkilatları ilə dövlət təminatı altında xarici borc alınması üzrə ümumilikdə 6.5 milyard dollar dəyərindən artıq müqavilələr imzalayıb, maliyyə naziri Samir Şərifov deyib.
"Azərbaycanın müqavilə üzrə ümumi xarici borcu 3.7 milyard dollar təşkil edir", - nazir deyib.
Onun sözlərinə görə, Maliyyə Nazirliyi konservativ siyasət aparır və "Dövlət borcu haqqında" Qanuna əsasən, idarəedilmə məsuliyyəti bu nazirliyin üzərinə qoyulan dövlət təminatı altında daxili və xarici borcların idarə olunması məsələlərini diqqət mərkəzində saxlamaqda davam edir.
"Biz xarici öhdəliklərimizi əhəmiyyətli dərəcədə genişləndirmək niyyətindəyik və müəyyən olunmuş limitlər çərçivəsində xarici borclar cəlb edəcəyik", - nazir deyib.
2010-cu ildə dövlət büdcəsində xarici borcların limiti 2.5 milyard dollar müəyyən edilib.
Xarici borc üzrə öhdəliklərin yerinə yetirilməsində problem yaranacağı halında dövlət büdcəsində təminat fondu yaradılacaq. Fonddakı vəsaitlərin orta illik həcmi, dövlət təminatı altında verilən kredit və borclar üzrə maliyyə öhdəliklərinin hesabat dövründə gözlənilən məcmu həcminin 25 faizindən aşağı olmamalıdır.
Məqalə müəllifi ilə əlaqə ünvanı: [email protected]
