Azərbaycan, Bakı, 29 oktyabr / Trend , müxbir N.İsmayılova/
Azərbaycanda ticarət sahəsindəki sahibkarların maarifləndirilməsi üzrə təlim proqramı hazırlanır. Bu barədə cümə axşamı Tacirlər və İstehsalçılar Birliyinin sədri Sevgim Rəhmanov bildirib.
"Biz bu məsələni ölkənin Təhsil Nazirliyi ilə artıq müzakirə etmişik. Nazirlik də ticarət sahəsi ilə məşğul olan şəxslər üçün iki-üç həftəlik treninqlərin keçirilməsinin vacibliyi ilə razılaşıb", - Rəhmanov bildirib.
Onun sözlərinə görə, bu, peşəkar texniki təhsil haqqında qanunun qəbul olunmasından və qısa treninq proqramının tərtib edilməsindən sonra mümkün olacaq.
Tacirlər və İstehsalçılar Birliyi tərəfindən keçirilən bazar araşdırmalarının nəticələrinə əsasən, ticarət sahəsində fəaliyyət göstərən sahibkarların böyük əksəriyyəti müvafiq təhsilə malik deyil və bu sahədəki qanunvericiliklə yaxşı tanış deyil. Rəhmanovun fikrincə, ölkədə bazarın bu seqmenti üzrə maarifləndirmə tədbirlərinin keçirilməsi onun gələcək inkişafına yardım edəcək.
Məqalə müəllifi ilə əlaqə ünvanı: [email protected]