Azərbaycan, Bakı, 11 noyabr / Trend , müxbir Ü.İsmayılova/
Azərbaycan hökuməti, xüsusilə də Nəqliyyat Nazirliyi yeni Beynəlxalq dəniz ticarət limanında logistika mərkəzinin inşasına tam dəstək göstərir. Bu barədə çərşənbə günü TRACECA-nın Azərbaycandan olan milli katibi Akif Mustafayev deyib.
"Logistika mərkəzinin tikinti işlərinə cari ilin sonu, növbəti ilin əvvəlində yeni limanın inşa işləri ilə paralel başlamaq planlaşdırılır", - Mustafayev deyib.
Onun sözlərinə görə, TRACECA-nın Milli Katibliyinin nümayəndə heyəti və Azərbaycanın Nəqliyyat Nazirliyi noyabrın 22-də Alman Beynəlxalq logistika mərkəzinin iş təcrübəsi ilə tanış olmaq üçün Almaniyaya gedəcəklər.
"Səfər zamanı dünyanın ən qabaqcıl logistika mərkəzlərindən biri olan Alman logistika mərkəzinin istifadə təcrübəsinin öyrənilməsi üçün bütün müvafiq materiallar toplanacaq", - Mustafayev deyib.
Ələt qəsəbəsindəki yeni Beynəlxalq dəniz ticarət limanının inşası üç mərhələdə həyata keçiriləcək və 2015-ci ildə sona çatacaq. Layihənin birinci mərhələsində konteynerlərin, "Ro Ro" tipli gəmilərin və adi (universal) yükdaşıyan gəmilərin qəbul edilməsi üçün üç bərəlik və üç yük gəmilik yanalma körpüsünün inşası nəzərdə tutulur. Layihənin ikinci mərhələsində üç yük gəmilik yanalma körpüsünün, layihənin üçüncü mərhələsində isə daha iki yük gəmilik yanalma körpüsünün inşası nəzərdə tutulur. Liman inşası layihəsinin dəyərini 400 milyon dollardan çox qiymətləndirirlər.
Yeni limanda 11 yanalma körpüsü inşa ediləcək, layihənin reallaşdırılmasının birinci mərhələsində onlardan altısının inşası başa çatdırılacaq. İnşa işləri başa çatdıqdan sonra liman 11,6 milyon tona qədər yük qəbul edə biləcək.
Hazırda Xəzər dənizində altı Beynəlxalq ticarət limanı var. Bunlar Bakı (Azərbaycan), Türkmənbaşı (Türkmənistan), Aktau (Qazaxıstan), Həştərxan (Rusiya), Ənzəli və Neka (İran) limanlarıdır.
Məqalə müəllifi ilə əlaqə ünvanı: [email protected]