Azərbaycan, Bakı, 12 mart / Trend , müxbir N.İsmayılova/
Dünya Bankının (DB) missiyası gələn həftə Bakı-Şamaxı-Muğan avtomobil yolunun ikizolaqlıdan dördzolaqlıya kimi genişləndirilməsi üzrə üçüncü magistral layihə çərçivəsində kredit sazişinə dair rəsmi danışıqlara başlayacaq. Bu barədə cümə günü DB-nin Bakı nümayəndəliyindən məlumat verilib.
Kredit sazişi üzrə rəsmi danışıqlar martın 15-də başlayacaq. Bununla əlaqədar DB-nin yol layihəsinin rəhbəri Jak Byure ölkəyə gələcək. Nümayəndəlikdən bildirilib ki, bu səfər layihənin hazırlanmasında həlledici mərhələ olacaq. Layihə çərçivəsində kreditin yekun şərtləri və layihənin detalları razılaşdırılacaq. Missiyanın yekunları üzrə layihə baxılmaq üçün DB Direktorlar Şurasına təqdim olunacaq. Təsdiqlənmək üçün isə iyunun sonlarına kimi təqdim olunacaq.
"Layihənin ümumi dəyəri 293 milyon dollar təşkil edir. Bunun 246 milyon dollarını bank qarışıq kredit kimi ayırmağa hazırdır",- nümayəndəlikdən bildirilib.
Beynəlxalq İnkişaf Assosiasiyasının (BİA DB qrupuna daxildir) vəsaitləri hesabına 2010-cu maliyyə ilində Azərbaycan üçün kvotadan 70 milyon dollar, Beynəlxalq Yenidənqurma və İnkişaf Bankının (BYİB) xətti ilə 176 milyon dollar ayrılacaq. Qalan 117 milyon dollar isə Azərbaycan hökuməti tərəfindən maliyyələşdirmənin payına düşür.
Bakı-Şamaxı-Muğan yolunun uzunluğu 124 kilometrdir. Təsdiqlənmiş layihəyə əsasən, onun tikintisi 90,11 milyon dollar həcmində qiymətləndirilir. 72,09 milyon dollar məbləğində tikinti işlərini DB maliyyələşdirəcək, 18,02 milyon dolları isə Azərbaycan tərəfi ayıracaq.
Tikinti işlərinin aparılması üçün baş podratçı İtaliyanın "Todini Costruzioni Generali S.p.A" şirkəti seçilib. Layihənin məsləhətçisi Finlandiyanın "Finroad" şirkətidir.
Azərbaycan 1992-ci ildən DB-nin üzvüdür. Bankla əməkdaşlıq dövründə respublikaya 47 layihənin maliyyələşdirilməsi üçün 2,5 milyard dollar məbləğində kreditin verilməsi təqdir edilib.
