Azərbaycan, Bakı, 8 may /Trend, N.İsmayılova/
Azərbaycan Dövlət Əmlak Komitəsi Masallı Konserv Səhmdar Cəmiyyətinin səhmlərinin 30 faizinin satışı üzrə investisiya müsabiqəsi elan edib, - şənbə günü dövlət komitəsindən yayılan məlumatda belə deyilir. Müsabiqədə Azərbaycanın fiziki və hüquqi şəxsləri, həmçinin, xarici investorlar iştirak edə bilərlər.
Müsabiqədə iştirak etmək istəyən iddiaçılar konservləşdirilmiş məhsulların səhmlərinin satışını genişləndirmək üçün investisiya proqramına öz təkliflərini verməlidirlər.
Müsabiqədə iştirak etmək istəyənlər investisiya təklifinin beş faiz dəyərinə bank zəmanəti və dövlət büdcəsinə 70 min manat dəyərində məbləğin qoyulması barədə təkliflər irəli sürməlidirlər.
Masallı Konserv Səhmdar Cəmiyyəti meyvə və tərəvəzlərin tədarükü, alkoqolsuz içkilərin və konservləşdirilmiş məhsulların istehsalı ilə məşğul olur. Zavod Masallı şəhəri Sultanov küçəsi - 35-də yerləşir.
Cari ilin aprel ayının 1-nə olan nəticələrə əsasən, müəssisənin 39,38 min, eləcə də əmək haqqı üzrə 650 manat borcu var. Müəssisənin debitor borcları isə 66,33 min manat təşkil edir.
Müsabiqədə iştirak etmək istəyənlər 7 iyundan başlayaraq saat 10:00-dan 17:30-a qədər Bakı şəhəri, Y.Səfərov - 20 ünvandan müsabiqənin şərtləri, xüsusi planları ilə bağlı və digər əlavə məlumatlar əldə edə bilərlər.
Ərizələrə 9 iyun saat 11:00-dan etibarən Dövlət Əmlak Komitəsinin binasında müsabiqə komissiyası tərəfindən baxılacaq.
Mayın 8-nə olan rəsmi məzənnə 0,8035 AZN/USD təşkil edir.
