Azərbaycan, Bakı, 11 avqust /Trend, müxbir A.Axundov/
Azərbaycanın Əmlak Məsələləri Dövlət Komitəsi Dünya Bankının "Daşınmaz Əmlakın Qeydiyyatı" Layihəsi çərçivəsində Qəbələ rayonunda Əmlak Məsələləri Dövlət Komitəsi yanında Daşınmaz Əmlakın Dövlət Reyestri Xidmətinin müasir standartlara cavab verən yerli Ərazi İdarəsinin tikintisini başa çatdırıb, Lənkəran və Xaçmazda isə ərazi idarələrinin tikintisi davam etdirilir. Bu barədə Dövlət Komitəsinin çərşənbə günü yayılan məlumatında deyilir.
Azərbaycan hökuməti və DB 2007-ci ilin iyulunda daşınmaz əmlakın vahid kadstr sisteminin birgə tətbiqi haqqında saziş imzalayıblar. Layihə dörd komponentdən ibarətdir: daşınmaz əmlakın qeydiyyata alınması; bazalı kartoqrafiya və torpaq kadastrı; treninqlər, siyasətin formalaşdırılması və layihənin idarə edilməsi. Layihənin dəyəri 38,57 milyon dollar təşkil edir. Bunlardan DB-nin kredit payına 30 milyon dollar düşür. Kredit vəsaitləri 20 il müddətinə beşillik imtiyazla verilib.
Məlumatda qeyd olunduğuna görə, layihəyə müxtəlif xidmətlərin və məsləhətçilərin cəlb edilməsi üçün beynəlxalq və milli tenderlər vasitəsilə 72 satınalma işi nəzərdə tutulub. İndiyədək bunlardan 43-ü üzrə Dünya Bankının tələblərinə və ölkə qanunvericiliyinə uyğun müqavilələr imzalanıb və əksər işlər başa çatdırılıb. Layihənin icra vəziyyətinin daimi nəzarətdə saxlanması, fəaliyyətinin əlaqələndirilməsi və qarşıya çıxan problemlərin operativ həlli üçün Dünya Bankının təmsilçiləri, icraçı agentliklər və layihə idarəetmə qrupu ilə mütəmadi və aktiv müzakirələr aparılır.
Layihə çərçivəsində yeni binaların tikintisi və mövcud binaların təmiri, Daşınmaz Əmlakın Vahid Kadastr və Qeydiyyat Sisteminin hazırlanması, notariuslara "on-line" xidmət, rəqəmsal kadastr xəritələrinin hazırlanması, kağız sənədlərin elektron sistemə daxil edilməsi və arxivləşdirilməsi nəzərdə tutulub. Bundan başqa, həmin komponent üzrə görüləcək işlərdə əmlakın qiymətləndirilməsi/vergiqoyma, daşınmaz əmlakın kadastrının aparılması və özəl sektorun inkişafı, ictimai agahlıq və biznes-planının hazırlanması da planlaşdırılır.
Rəqəmsal daşınmaz əmlak kadastrı xəritələrinin hazırlanmasında 40 min kv.km rəqəmli kadastr xəritələrinin əhatə olunması nəzərdə tutulub. Bununla bağlı artıq pilot layihə həyata keçirilib.
Əmlakın qiymətləndirilməsi/vergiqoyma ilə bağlı beynəlxalq ekspertlərin məsləhətləri əsasında komitə tərəfindən qiymətləndirmə metodologiyasının hazırlanması istiqamətində də işlər görülür.
Layihə çərçivəsində daşınmaz əmlakın avtomatlaşdırılmış idarəedilmə sisteminin, inzibati sistem və xidmət sisteminin təkmilləşdirilməsi üzrə tədbirlər görülür.
Layihə çərçivəsində DƏDRX-in nəzdində Təlim Mərkəzi artıq yaradılıb. Təlim planı beynəxalq ekspert və icraçı agentliklərin mütəxəssisləri tərəfindən yeniləşdirilib və indiyədək artıq 7 təlim keçirilib. Bura Təlim Mərkəzinin yaradılması, birgə İT informasiyanın idarəolunması strategiyasının inkişafı, qanunvericiliyin inkişafı, Hüquq Mərkəzinin yaradılması, Layihə İdarəetmə Qrupu (LİQ), Monitorinq və Qiymətləndirmə (M&Q) daxildir. Bu komponentin məqsədi layihənin uğurla reallaşması məqsədilə mütəmadi təlimlərin keçirilməsi, siyasi və hüquqi sənədlərin hazırlanmasıdır.
