Azərbaycan, Bakı, 20 avqust /Trend, müxbir İ.Xəlilova/
Azərbaycanın maliyyə sektorunda layihələrin həyata keçirilmə gedişinin icmalı üçün sentyabrın 5-dən 1-dək Almaniyanın "KfW" bankının ölkədəki maliyyə layihələri üzrə meneceri Gerald Hünberqin səfəri olacaq. Bu barədə cümə günü "KfW"in Bakı ofisindən bildiriblər.
"O, Azərbaycandakı layihələrin indiki vəziyyəti ilə tanış olacaq və onların irəliləyiş məsələlərini müzakirə edəcək", - bankdan bildiriblər.
Azərbaycanın "KfW"lə əməkdaşlığı 1994-cü ildən başlayıb. Bankın ölkədə strateji fəaliyyət istiqamətləri enerji, su və digər infrastrukturun bərpası, maliyyə, bank, özəl sektorun, səhiyyə sisteminə, ətraf mühit və s. inkişafına dəstək verməkdir. Azərbaycan üzrə portfel hazırda 200 milyon avroya çatır.
Hazırda "KfW" aqrar sektorun, kiçik və orta sahibkarlığın inkişafının maliyyələşdirilməsi ilə yanaşı, "Access Bank"ın kapitalında iştirak edir. Alman bankının maliyyə dəstəyi ilə kredit-zəmanət fondu yaradılıb, Azərbaycanın Əhalinin Əmanətlərinin Sığortalanması Fonduna investisiyalar yatırılıb.
Əməkdaşlıq başlanandan "KfW" Azərbaycan layihələrinin güzəştli maliyyələşdirilməsinə üstünlük verib (40 il müddətinə 10 ili güzəştli olmaqla və illik 0,75 faizlə), lakin son illər bank qatışıq kreditlərə daha çox üstünlük verir.
Zaqafqaziya regionuna xidmət göstərmək üçün bank ötən ilin mayında Tbilisidə alman əməkdaşlıq evini açıb. Bununla əlaqədar, "KfW"in ofisinin Azərbaycana nümayəndəlik şəklində köçürülmə məsələsi gündəlikdən çıxarılıb; belə ki, bank regiondakı əməliyyatları Tbilisidəki Əməkdaşlıq evi vasitəsilə tənzimləyəcək.