Аzərbaycan, Bakı, 24 avqust /Trend, müxbir А.Axundov/
Yaxın günlərdə 2010-cu ilin sonuna qədər Dövlət Şəhərsalma və Memarlıq Komitəsinə N.Nərimanov və Azərbaycan prospektləri, Nizami və Bakıxanov küçələrini əhatə edən ərazilərin regenerasiyası üzrə pilot layihə təqdim edəcək xüsusi işçi qrup yaradılıb. Bu barədə komitədən verilən məlumatda deyilir.
Bu qərar Dövlət Şəhərsalma və Memarlıq Komitəsində Bakı şəhəri ərazilərinin regenerasiyası mövzusunda Ümumdünya Bankının təşəbbüsü ilə keçirilən treninq-seminarda qəbul olunub.
Məlumata görə, layihənin məqsədi Bakının problemli ərazilərindən birini yenidən qurmaq, beynəlxalq təcrübədən istifadə edərək, qərarın sxematik və konseptual variantını hazırlamaqdır.
Layihənin rəhbəri Ümumdünya Bankı tərəfindən təyin olunmuş məşhur ingilis memarı, "McBains Cooper" şirkətinin əməkdaşı Zəki Qiyasidir.
Layihənin gerçəkləşməsi zamanı işçi qrupu üzvlərinin London və Liverpula səfərləri gözlənilir. Layihəyə sərf olunan bütün xərclər və səfərlər Ümumdünya Bankı tərəfindən ayrılan məbləğ hesabına həyata keçirilir.
