Azərbaycan, Bakı, 26 avqust /Trend, müxbir N.İsmayılova/
"Atrabank" iri layihələrin kreditləşdirilməsi siyasətindən istehlak kreditləşdirmələri tərəfə dönüş edib. Bu barədə bankın İdarə Heyətinin sədri Aydın Vahabzadə deyib.
"Bu gün bank üçün kiçik və orta sahibkarlığın maliyyələşdirilməsi və istehlak kreditləşdirilməsi prioritet sahələrdir. Bank iri layihələrin kreditləşdirilməsi siyasətindən uzaqlaşıb və bu gün belə kreditləri yalnız bankla uzun müddət və yaxşı əməkdaşlıq etmiş müştərilərə verir", - Vahabzadə bildirib.
Onun sözlərinə görə, istehlak kreditlərinin və KOS inkişafı üzrə kreditlərin verilməsi özünü daha çox doğruldur, çünki bu sahələrdə risklər xeyli azdır.
Bu gün bankın kredit portfeli 24,6 milyon manat təşkil edir ki, buradan istehlak kreditlərinin payına 6,28 milyon manat düşür. Bank illik 30 faiz dərəcə ilə istehlak kreditləri verir.
Bankın nizamnamə kapitalı 10,4 milyon manata bərabərdir, ümumi kapitalı isə 11 milyon manatı ötür.
"Atrabank" 1992-ci ilin dekabrında yaradılıb. Bankın fəaliyyətinin əsas istiqamətləri kənd təsərrüfatının, neft və digər sahələrin inkişafıdır. Hazırda bankın 13 filialı fəaliyyət göstərir. Onlardan 9-u Bakıda, 4-ü isə Azərbaycanın regionlarındadır.
