Azərbaycan, Bakı, 28 avqust /Trend, müxbir N.İsmayılova/
Azərbaycanın Əmlak Məsələləri Dövlət Komitəsi pambıq lif və pambıq parça istehsalçısı "Mingəçevir Toxucu" SC-nin səhmlərinin satışı üzrə investisiya tenderi elan edib. Bu barədə şənbə günü Dövlət Komitəsindən bildiriblər.
Satışa 99,31 faiz həcmdə səhmlər paketi çıxarılıb. Onlardan 85 faizi investisiya müsabiqəsinin standart paketinin səhmləri və 14,31 faizi isə əmək kollektivinə səhmlərin güzəştli satışından qalan həcmdir.
Müsabiqədə Azərbaycanın hüquqi və fiziki şəxsləri və xarici investorlar iştirak edə bilərlər.
İddiaçılar investisiya proqramını müasir tələblərə uyğun yeni texnologiyaların tətbiqi və iş yerlərinin bərpası üzrə təkliflərlə təqdim etməlidirlər.
İddiaçılar investisiya təklifinin dəyərinin beş faizində bank zəmanətini və dövlət büdcəsinə 700 min manatın köçürülməsi, eləcə də ən azı 50 min özəlləşdirmə çekinin silinməsi ilə bağlı təklifi də təqdim etməlidirlər. Xarici investorlar da özəlləşdirmə paylarını təqdim etməlidirlər.
"Mingəçevir Toxucu" pambıq lif və pambıq parça istehsalında ixtisaslaşıb. O, Mingəçevir şəhərində yerləşir.
SC-nin nizamnamə kapitalı avqustun 1-nə olan məlumata görə, 1,376 milyon manat təşkil edir. Bu məbləğə hər birinin dəyəri iki manat olmaqla 687 784 səhm buraxılıb. Müsabiqənin predmeti ümumi nominal dəyəri 1,366 milyon manat olan 683 010 səhmdir.
Müəssisənin 917,267 min manat məbləğində, o cümlədən əməkhaqqı üzrə 184,725 min manat, xammal, xidmət və iş üzrə 358,23 min manat borcu var. Bununla yanaşı, müəssisənin debitor borcu 2,956 milyon manat təşkil edir. Müəssisə 1960-cı ildən fəaliyyət göstərir.
İddiaçılar müsabiqənin tələbləri, özəlləşdirmə planı və əlavə məlumatı 27 sentyabr 2010-cu il saat 10:00-dan 17:30-dək Bakı şəhəri Y.Səfərov küç, 20 ünvanında əldə edə bilərlər. Sənəd və təkliflər sentyabrın 27-dək saat 10:00-dan 17:30-dək qəbul edilir.
Təkliflərə müsabiqə komissiyası tərəfindən Dövlət Komitəsinin binasında sentyabrın 29-da saat 15:00-dan etibarən baxılacaq.
Avqustun 28-nə olan rəsmi məzənnə 0,8037 AZN/USD təşkil edir.
